Senat: Kattaqoʻrgʻon shahri hududi kengaytiriladi

Senat yalpi majlisida Samarqand viloyatining Kattaqoʻrgʻon shahri, Kattaqoʻrgʻon va Nurobod tumanlari chegaralarini oʻzgartirish toʻgʻrisidagi masala muhokama qilindi.

Ushbu masala aholiga munosib yashash sharoitini yaratish, buning uchun muhandislik-kommunikatsiya tizimlari, shuningdek, ijtimoiy soha (maktab, bogʻcha, kasalxona) obʼektlarini barpo etish, yangi ish oʻrinlarini yaratishda muhim ahamiyatga ega ekani qayd etildi.

Taʼkidlanganidek, Kattaqoʻrgʻon shahri Samarqand viloyatining geografik nuqtai nazardan shimoliy-gʻarbida joylashgan boʻlib, bugungi kunda shahar aholisi soni qariyb 95 ming kishini, umumiy yer maydoni 4,4 ming gektarni tashkil etadi.

Shahar aholisining oʻsish surʼati oxirgi 5 yilda har yili oʻrtacha 1,1 ming kishini tashkil etmoqda. Bundan tashqari, Kattaqoʻrgʻon shahrida doimiy roʻyxatdan oʻtmagan 4 mingga yaqin aholi va talabalar istiqomat qiladi. Aholi zichligi 1 kvadrat kilometr maydonga 9,5 kishiga toʻgʻri kelib, Samarqand viloyati boʻyicha aholisi eng zich joylashgan hudud hisoblanadi.

Shu bois, Senat qarori loyihasida Kattaqoʻrgʻon shahar hududini kengaytirish maqsadida unga chegaradosh boʻlgan Kattaqoʻrgʻon tumanidan 1,9 ming gektar va Nurobod tumanidan 971 gektar, jami 2,9 ming gektar yer maydonini shahar tarkibiga oʻtkazish, shuningdek, Nurobod tumanining Kattaqoʻrgʻon tumani bilan chegaradosh boʻlgan hududlaridan 600 gektar yer maydonini Kattaqoʻrgʻon tumaniga oʻtkazish nazarda tutilmoqda.

Shahar hududining kengayishi natijasida Kattaqoʻrgʻon oʻrta shaharlar toifasidan katta shaharlar toifasiga oʻtkazilib, shahar aholisi uchun qulay sharoitlar yaratish, xususan, yangi infratuzilma obʼektlari hamda koʻp qavatli turar joy komplekslari barpo etish, urbanizatsiya jarayonlarini tezlashtirish imkoni yaratiladi. Yangi ishlab chiqarish va xizmat koʻrsatish obʼektlari tashkil etiladi hamda qoʻshimcha ish oʻrinlari yaratiladi.

Xususan, 50 gektar maydonda “Urgut” erkin iqtisodiy sanoat zonasi filiali, shuningdek, 30 gektarda 3 ta kichik sanoat zonasi tashkil etilishi rejalashtirilmoqda.

Muhokama yakunida mazkur masala yuzasidan Senatning tegishli qarori qabul qilindi.