Surxondaryoda xalqaro ahamiyatga ega ko‘prikka talafot yetdi

Viloyat hokimligi Sariosiyo tumanidagi Obizarang daryosi ustidagi ko‘prikda yuzaga kelgan holat yuzasidan rasmiy axborot berdi.

2026-yil 21-iyun kuni taxminan soat 20:30-20-45 atrofida tog‘li hududlarda kuzatilgan yog‘ingarchiliklar oqibatida Obizarang daryosida suv sathi keskin oshib, sel oqimi yuzaga keldi.

Tabiiy hodisa oqibatida Sariosiyo tumani "Anorzor" mahallasi hududidan oqib o‘tuvchi Obizarang daryosi ustidagi, M-41 "Bishkek – Dushanbe – Termiz" xalqaro ahamiyatga ega avtomobil yo‘lining 1449-kilometrida joylashgan ko‘prikka zarar yetdi.

Inshootga yetgan zararga asosiy sabab — yog‘ingarchiliklar natijasida daryoda suv sathi va oqim tezligi keskin ortib, ko‘prik tayanchlariga yuqori bosim tushgan.

Ko‘prik konstruksiyalarida shikastlanishlar aniqlangach, mazkur yo‘nalishda transport harakati vaqtincha to‘xtatildi.

Hozirda avtotransport harakati Uzun tumani hududidagi Do‘stlik, Yangi yo‘l va Qarashiq mahallalari orqali o‘tuvchi aylanma yo‘nalish bo‘yicha tashkil etilgan.

Ayni paytda mutaxassislar tomonidan ko‘prikning texnik holati o‘rganilmoqda, yetkazilgan zarar ko‘lami baholanmoqda hamda transport qatnovini tiklash bo‘yicha zarur muhandislik chora-tadbirlari ishlab chiqilmoqda.

Mazkur ko‘prik 1977-yilda qurilgan bo‘lib, uzunligi 54,7 metrni tashkil etadi. U Tojikiston Respublikasi bilan bog‘lovchi muhim transport yo‘nalishlaridan biri hisoblanib, ko‘prik orqali soatiga o‘rtacha 600–800 ta avtotransport vositasi harakatlanadi.