Toshkent IES boʻyicha video haqiqatga toʻgʻri kelmaydi — Energetika vazirligi

Xabarda taʼkidlanishicha, video tarqalgan paytda Toshkent IESda asosiy yoqilgʻi sifatida tabiiy gaz, vaqtinchalik zaxira sifatida esa qisqa muddat mazut ishlatilgan.

Hozirgi holat boʻyicha rasmiy maʼlumot

Vazirlikning maʼlumot berishicha, Toshkent IESda oʻrnatilgan “yengli filtr” qurilmasi chiqindilarni 99,5 foiz samara bilan tozalaydi. Bu orqali havoga chiqariladigan qattiq zarrachalar miqdori 100 mg/m³ dan 6 mg/m³ gacha kamaygan.

Shuningdek, stansiyada:

• tutun gazlari tarkibini aniq oʻlchaydigan avtomatik monitoring tizimi,
• maʼlumotlarni real vaqt rejimida Ekologiya va iqlim oʻzgarishi milliy qoʻmitasiga uzatuvchi datchiklar,
• sanitariya-himoya hududida oʻrnatilgan zamonaviy ekopost

fauoliyat koʻrsatmoqda.

Rasmiy axborotga koʻra, joriy kuz-qish mavsumi boshlanganidan beri stansiyada mazut umuman ishlatilmagan, obʼekt toʻliq tabiiy gaz asosida ishlamoqda.

Notoʻgʻri maʼlumot tarqatmaslik boʻyicha ogohlantirish

Vazirlik jamoatchilikni va blogerlarni tasdiqlanmagan maʼlumotlarni tarqatmaslikka chaqirar ekan, bunday holatlar uchun amaldagi qonunchilikda javobgarlik belgilanganini eslatdi.