Toshkent xalqaro aeroportida yangi ikki qatorli avtomobillar uchun yoʻlak tashkil etiladi

Toshkent xalqaro aeroportida uchib kelish terminali va unga tutash hududni rekonstruksiya qilish ishlari davom etmoqda. Oʻzgarishlar, birinchi navbatda, yoʻlovchilar va ularni kutib oluvchilar uchun yanada qulay sharoit yaratish, shuningdek, taksi xizmatlari koʻrsatishni tartibga solishga qaratilgan.

Loyihada bino fasadini kengaytirish bilan bir qatorda, qoʻshimcha avtomobillar uchun yoʻl qurish ham koʻzda tutilgan. Birinchi qatordagi (hozirda mavjud) yoʻl faqat turistik avtobuslar va aeroportning rasmiy taksilari kirishi uchun moʻljallangan. Bu yoʻlak faqat premium segmentidagi avtomobillar uchun emas. Bir nechta litsenziyalangan taksi operatorlari kimoshdi savdosi orqali taksi xizmatlarini koʻrsatish huquqiga ega boʻladi. Ular oʻz navbatida yoʻlovchilarga turli narx toifalarida - byudjet, komfort va biznes-klassgacha taksi xizmatlarini taqdim etishi koʻzda tutilgan. Ushbu yondashuv taksi xizmatlari uchun adolatli muhitni yaratishga yordam beradi va yoʻlovchilar uchun sayohatlarni arzonlashtiradi.

Ikkinchi qatordagi avtomobil yoʻlagi esa kutib oluvchilar va taksi agregatorlari avtomobillari uchun ochiq boʻladi. Tirbandliklar oldini olish uchun vaqt chegarasi joriy etiladi: yoʻlakda 10 daqiqadan koʻproq vaqt davomida toʻxtash mumkin boʻlmaydi. Nazoratni amalga oshirish uchun yoʻlakka Ichki ishlar vazirligi tizimi bilan integratsiyalashgan videokuzatuv kameralari oʻrnatiladi. Bu kameralar yoʻlakda turish muddatining oshib ketishini qayd etadi va qoidabuzarga avtomatik ravishda jarima yuboradi. Uchib ketish terminalidagi avtomobillar yoʻlagi ham xuddi shunday tizimda ishlaydi.

"Uchib kelish hududidagi bugungi vaziyatni qoniqarli deb boʻlmaydi: istalgancha tashlab ketilgan avtomobillar, noqonuniy tashuvchilar va doimiy tirbandlik yoʻlovchilar va ularni kutib oluvchilar uchun jiddiy noqulayliklar tugʻdirmoqda. Biz buni tan olamiz va oʻz navbatida vaziyatni yaxshilash uchun barcha choralarni koʻrmoqdamiz. Biz, tartibni tiklash, transport oqimini nazorat qilish va xizmat koʻrsatish sharoitlarini yaxshilashga qaratilgan chora-tadbirlarni amalga oshirmoqdamiz. Mazkur oʻzgarishlar aeroportning poytaxt aholisi uchun ham, xorijlik mehmonlar uchun ham qulay va xavfsiz boʻlishiga olib keladi”, - deya izoh berdi Uzbekistan Airports kompaniyasi matbuot xizmati.

Rekonstruksiya ishlari aeroport faoliyati toʻxtatilmasdan amalga oshirilayotgani sababli jarayon ikki bosqichga boʻlingan. Birinchi bosqichda joriy yilning oktabr oyi oxiriga qadar avtomobillar yoʻlagi va 330 ta avtomobilga moʻljallangan, jumladan, tez quvvatlantirish shoxobchalari joylashgan avtoturargoh foydalanishga topshiriladi. Ikkinchi bosqichda uchib ketish hamda uchib kelish terminallarini birlashtirish va qurilish texnikasi kirishi uchun qoldirilgan yoʻlak hisobiga kirish yoʻllarini kengaytirish va uzaytirish rejalashtirilgan.