Urgutda oʻquvchi qizlar janjali ortidan 12 ota-ona jarimaga tortildi

Samarqand viloyati Maktabgacha va maktab taʼlimi boshqarmasining xabar berishicha, voqea yuzasidan ishchi guruh tuzilib, holat ichki ishlar idoralari bilan hamkorlikda oʻrganilgan.

Aniqlanishicha, joriy yilning 13 oktabr kuni 41-umumtaʼlim maktabining 9-"A" sinf oʻquvchisi F.F. bilan 9-"B" sinf oʻquvchisi R.G. telefon orqali gap talashgan. Oradan bir kun oʻtib, 14 oktabr kuni soat 14:20 atrofida ular Qoratepa mahallasining Sarbozor koʻchasida uchrashib, oʻzaro janjallashgan.

Voqea joyida boshqa sinfdoshlari ham boʻlgan. Shundan soʻng maktabda oʻquvchilar va ularning ota-onalari bilan profilaktik suhbat oʻtkazilgan.

Boshqarma maʼlumotiga koʻra, tuman IIB xodimlari tomonidan jarayonda ishtirok etgan jami 12 nafar oʻquvchining ota-onalariga nisbatan Maʼmuriy javobgarlik toʻgʻrisidagi kodeksning 47-moddasiga asosan maʼmuriy bayonnoma rasmiylashtirilgan.