Voyaga yetmagan qiz bilan turmush qurganlik uchun javobgarlik kuchaytiriladi

Loyihada qarindoshlar oʻrtasida nikohni taqiqlash nazarda tutilmoqda. Xususan, yon shajara boʻyicha 2-, 3- va 4-darajadagi qarindoshlar, togʻa va amaki, amma va xola oʻz jiyanlari bilan, shuningdek, togʻavachcha, amakivachcha, ammavachcha hamda xolavachchalar oʻrtasida nikoh tuzishga yoʻl qoʻyilmasligi belgilanmoqda.

Shu bilan birga, nikoh yoshini kamaytirish tartibiga ham aniqlik kiritilmoqda. Nikohga kirishni istagan shaxslarning arizasiga koʻra, homiladorlik yoki bola tugʻilishi bilan bogʻliq holatlarda tuman yoki shahar hokimi nikoh yoshini koʻpi bilan bir yilga kamaytirishi mumkin.

Qonun loyihasiga muvofiq, yetarli yoshga toʻlmagan shaxs bilan haqiqiy nikoh munosabatlariga kirishish, agar ushbu qilmish uchun avval maʼmuriy javobgarlik qoʻllanilgan boʻlsa, BHMning 50 baravaridan 100 baravarigacha, yaʼni 20 million 600 ming soʻmdan 41 million 200 ming soʻmgacha jarima yoki 240 soatdan 300 soatgacha majburiy jamoat ishlari yoxud 2 yilgacha axloq tuzatish ishlari bilan jazolanishi belgilanmoqda.

Maʼlumot uchun, amaldagi qonunchilikka koʻra, ushbu qilmish uchun BHMning 20 baravaridan 30 baravarigacha, yaʼni 8 million 240 ming soʻmdan 12 million 360 ming soʻmgacha jarima yoki 240 soatgacha majburiy jamoat ishlari yoxud 1 yilgacha axloq tuzatish ishlari jazosi nazarda tutilgan.