Yana 3 ta tumanga yangi hokim tayinlandi

Qoraoʻzak tumani 

Anvar Baymuratov Qoraqalpogʻiston Respublikasi Qoraoʻzak tumaniga hokim etib tayinlandi. 

Anvar Baymuratov 1983 yil 11 iyulda Respublikaning Nukus shahrida tugʻilgan. 2020 yildan bugunga qadar Qoraoʻzak tumani hokimining oʻrinbosari — sarmoyalar va tashqi savdo boʻlimi boshligʻi lavozimida ishlab kelayotgandi. 

Shuningdek, u Savdo-sanoat palatasi Qoraqalpogʻiston Respublikasi boshqarmasi, Qoraqalpogʻiston Xususiylashtirilgan korxonalarga koʻmaklashish va raqobatni rivojlantirish qoʻmitasi, Qoraqalpogʻiston Investitsiyalar va tashqi savdo vazirligida maʼsumiyatli lavozimlarda faoliyat olib borgan. 

Gurlan tumani 

Oʻrazbayev Ruslan Xajibayevich Xorazm viloyati Gurlan tumani hokimi lavozimiga tayinlandi. 

Oʻrazbayev 1979 yilda Xorazm viloyatida  tugʻilgan, 2000 yilda Toshkent irrigatsiya va qishloq xoʻjaligini mexanizatsiyalash muhandislari institutini tamomlagan. 

Bundan oldin, u Oʻzbekiston Respublikasi Iqtisodiyot va moliya vazirligi huzuridagi Kadastr agentligining Xorazm viloyati boshqarmasi boshligʻi  lavozimida ishlagan. Ruslan Xajibayevich hokimlikka Prezident huzuridagi Davlat xizmatini rivojlantirish agentligining Milliy kadrlar zaxirasidan tavsiya etilgan. 

Yangiariq tumani 

Matnazarov Zafarbek Bahadirovich Xorazm viloyati Yangiariq tumaniga hokim vazifasiga tayinlandi. 

Matnazarov 1986 yilda Xoramda tugʻilgan, maʼlumoti oliy, Toshkent moliya institutini tamomlagan. Tayinlovga qadar Qoʻshkoʻpir tumani hokimining moliya-iqtisodiyot va kambagʻallikni qisqartirish masalalari  boʻyicha birinchi oʻrinbosari — tuman iqtisodiy taraqqiyot va kambagʻallikni qisqartirish boʻlimi boshligʻi lavozimida ishlagan. 

Zafarbek Bahadirovich ham hokimlikka Prezident huzuridagi Davlat xizmatini rivojlantirish agentligining Milliy kadrlar zaxirasidan tavsiya etilgan. 

Eslatib oʻtamiz, bundan avval Taxiatosh, Mingbuloq, Furqat hamda Toshkent tumaniga yangi hokimlar tayinlangandi.