Oʻzbekistonda ish tashlash huquqi qonuniy mustahkamlanmoqda

Senat yangi tahrirdagi Konstitutsiyada belgilangan qonunchilik tashabbusi huquqidan ilk marotaba foydalanib, Qonunchilik palatasiga “Fuqarolarning mehnat huquqlari kafolatlari kuchaytirilishi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi qonunchilik taklifini kiritdi. 

Qonun loyihasi ish tashlash huquqini qonuniy tartibga solishni nazarda tutadi. Unda ish tashlashning aniq taʼrifi va tushunchalari, uni oʻtkazish tartib-taomillari, xodimlarga ish tashlash jarayonida beriladigan kafolatlar belgilanmoqda. 

Xoʻsh, ish tashlash jarayoni qay tartibda kechadi, qaysi soha vakillari ish tashlay olmaydi? Ish tashlashning oldini olish uchun qanday choralar koʻrilishi kerak?

OʻzA muxbiri shu kabi savollar bilan Oliy Majlis Qonunchilik palatasi deputati Zuhriddin Mavlonovga yuzlandi. 

— Milliy qonunchiligimizni Xalqaro mehnat tashkilotining talablariga muvofiqlashtirish maqsadida ish tashlash huquqi qonun bilan kafolatlanmoqda. Bu boʻyicha 2 ta qonun, 4 ta kodeksga qator oʻzgartirish va qoʻshimchalar kiritilmoqda. Jumladan, ish tashlashning tartib-taomillari, yaʼni ish tashlashni boshlash, kechiktirish, toʻxtatib turish, ish tashlashda ishtirok etgan xodimlarga kafolatlar berish hamda ish tashlashga oid taqiq va cheklovlar aniqlashtirilmoqda. Mehnat nizolarini koʻrish boʻyicha tartiblar, noqonuniy ish tashlash holatlarini sudda koʻrish tartiblari oʻz aksini topmoqda. 

Shu bilan birga, xodimlarning ish tashlashi boshqa fuqarolarning huquqlariga daxl qiladigan soha vakillari — harbiylar, mudofaachilar, energetika tizimi kabi soha xodimlari ish tashlashi mumkin emasligi belgilanmoqda. 

Qonun loyihasi milliy qonunchilikni xalqaro mehnat standartlariga toʻliq moslashtirish, ijtimoiy adolat, tenglik va demokratik boshqaruv prinsiplarini amalda mustahkamlashga xizmat qiladi, — dedi deputat.