Oʻzbekistonda qoramollarda xavfli kasallik tarqaldimi?

Ijtimoiy tarmoqlarda fargʻonalik ayol qoramollarga yuqumli kasalliklar tarqalgani haqida chiqish qilgandi. Mazkur holatga nisbatan Qishloq xoʻjaligi vazirligi rasmiy munosabat bildirdi.

"Holat Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi hamda tegishli idora vakillari hamkorligida oʻrganildi. Soʻnggi olti oy davomida hududdagi (Fargʻona) chorva mollarida biror bir kasallik aniqlanmagan. Qoramollar sogʻlom parvarish qilinmoqda", deyiladi vazirlik munosabatida.

Shuningdek, yolgʻon va asossiz xabar tarqatgan fuqaroga bu ishi uchun qonunchilikda jiddiy jazo borligi tushuntirilgan hamda mutasaddi idoralar tomonidan ogohlantirilganligi haqida ham munosabatda qayd etilgan.

“Vazirlik tizimga doir har qanday yoʻnalish jiddiy nazoratga olingan. Shuningdek, chorvachilikda yangi va zamonaviy yondashuvlar, qoramollarni sifatli yetishtirish, ularni ehtimoliy kasalliklardan saqlash boʻyicha ham doimiy kuzatuv oʻrnatilgan”, deya vazirlik qoʻshimcha qilgan.