Oʻzbekistonda yuzni aniqlash tizimiga ega kameralar oʻrnatiladi

 Bu Prezidentning jamoat xavfsizligini kuchaytirishga qaratilgan yangi qarorida nazarda tutilgan.

Dasturga koʻra, banklar, yirik sanoat korxonalari, mahalliy hokimiyatlar binolari va boshqa qoʻriqlanadigan obʼektlarning kirish-chiqishlarida zamonaviy texnik xavfsizlik tizimlari bosqichma-bosqich joriy etiladi. 

Alohida eʼtibor taʼlim muassasalariga qaratilgan. Davlat, nodavlat hamda xorijiy taʼlim tashkilotlarining filiallarida xavfsizlik endilikda kompleks tarzda taʼminlanadi. Dastur doirasida ichki ishlar organlari huzuridagi Qoʻriqlash departamenti signalizatsiya tizimlari, xavfsizlik tugmalari va videokuzatuv kameralarini oʻrnatish hamda ularga texnik xizmat koʻrsatishni shartnoma asosida amalga oshiradi.

Rasmiylarga koʻra, yangi texnologik yechimlar hodisalarga tezkor javob berish, obʼektlarga ruxsatsiz kirishlarning oldini olish va shubhali shaxslarni aniqlash imkoniyatlarini sezilarli darajada kuchaytiradi. Taʼlim muassasalari uchun esa bu oʻquvchilar va pedagoglar xavfsizligini yanada mustahkamlashga xizmat qiladi.