Poyezd ustida selfi tushmoqchi boʻlgan maktab oʻquvchisini tok urdi

Qayd etilishicha, mazkur holat viloyatning Bogʻdod tumanida sodir boʻlgan. 2011 yilda tugʻilgan 7-sinf oʻquvchisi tumandagi temiryoʻl vokzaliga oʻzboshimchalik bilan kirib, stansiyada turgan poyezd vagonlariga chiqqan. Keyin oʻzini selfi qilgan. Buning oqibatida bolani kuchli elektr toki urgan. 

Mazkur voqeani Fargʻona viloyati Transportda xavfsizlikni taʼminlash boshqarmasi boshligʻi oʻrinbosari Muzaffar Salimov ham tasdiqlagan.

"Navbatchilik qismi 61-sonli oʻrta taʼlim maktabida oʻqiydigan 7-sinf oʻquvchini toʻk urgani haqida xabar kelib tushdi. Oʻrganishlar davomida oʻquvchi vokzalning belgilanmagan joyidan oʻtib, temir yoʻl ustida turgan vagonga chiqqani, soʻng telefonida oʻzini selfi qilayotganda elektr toki urgani aniqlandi", deydi masʼul.

Tok urishi oqibatida ogʻir tan jarohati olgan 7-sinf oʻquvchisi zudlik bilan tuman shifoxonasiga olib borilgan.

"Bemor kasalxonaga juda ogʻir ahvolda olib kelindi. Dastlab uni tibbiy muolaja qildik, keyin uni reanimatsiya boʻlimiga olib chiqdik. Bolaning tanasi, yuzi, boʻyni, koʻkragi, qorini, ikki qoʻli, oyoq va son sohalarining 50 foizi tok urishi ortidan kuygan edi", deydi shifokor.

Bundan tashqari, u bemorga ikkinchi-uchinchi darajali "a" kuyish, bosh miya yopiq shikasti hamda miya chayqalishi tashxisi qoʻyilganligini ham qoʻshimcha qilib, hozir uning ahvoli yaxshilanib borayotganini ham aytgan.