Qashqadaryodagi maktabda yuz bergan janjal "mayda bezorilik" deb baholandi

Qayd etilishicha, voqea joriy yilning 17 oktabr kuni Qarshi shahrida joylashgan 32-sonli oʻrta taʼlim maktabida yuz bergan. Shu maktabda algebra fanidan dars beruvchi oʻqituvchi M.M. (ayol) va 10-"B" sinf oʻquvchisi. E.Oʻ. oʻrtasida oʻzaro kelishmovchilik kelib chiqib, ogʻzaki tortishib qolishgan. 

Shundan soʻng oʻqituvchi M.M. oʻquvchi E.Oʻ.ni yuz sohasiga urgan, oʻquvchi qiz ham qoʻl koʻtarmoqchi boʻlganida birgalikda yiqilib tushishgan.

"Hozirda holat yuzasidan Qarshi shahar IIB tomonidan tergovga qadar tekshiruv olib borilmoqda", deyiladi ombudsman izohida.

 Bundan tashqari, M.M. va E.Oʻ.larning xatti-harakatlariga chora koʻrish uchun mazkur ish Maʼmuriy javobgarlik toʻgʻrisidagi kodeksning 183-moddasiga (Mayda bezorilik) asosan sudga yuborilgan. 

Eslatib oʻtamiz, avvalroq Andijonda maktab direktori sinfxonasida pirotexnika vositalaridan foydalangan bir guruh oʻquvchilarni kaltaklagani uchun ishdan olingan edi.