Roʻmol oʻragan erkaklar: Oʻzbekistonda ayollar kiyimida yurgan yana bir erkak ushlandi

Andijon IIBga koʻra, Andijon shahridagi bolalar bogʻida Shahrixon tumanida istiqomat qiluvchi erkak ayollarga xos kiyinib, yuzini toʻsib olgan. U bu qilmishi uchun maʼmuriy javobgarlik toʻgʻrisidagi kodeksning 184-4-moddasi (jamoat joylarida shaxsini identifikatsiya qilish imkonini bermaydigan koʻrinishda boʻlish) aybi bilan bazaviy hisoblash miqdorining 15 baravari miqdorda jarimaga tortilgan. 

Shuningdek, joriy yilning 19 iyun kuni poytaxtning Shayxontohur tumanida joylashgan "Chorsu" bozori oldida tanib boʻlmas darajada yuzini toʻsib, yoʻlda ketayotgan fuqaro IIO xodimlari tomonidan ushlanadi. Dastlab u xodimlarga xizmat vazifasini bajarishiga ruxsat bermasdan qarshilik koʻrsatgan. Shundan soʻng, fuqaro shaxsini aniqlash uchun IIB binosiga olib ketilgan. Mazkur jarayonda uning ayol emas, erkak ekanligi maʼlum boʻlgan. 

20 iyun kuni Jinoyat ishlari boʻyicha Shayxontohur tuman sudida unga qarshi ochilgan maʼmuriy ish koʻrib chiqilgan. U Maʼmuriy javobgarlik toʻgʻrisidagi kodeksning 184-4-moddasi (jamoat joylarida shaxsini identifikatsiya qilish imkonini bermaydigan koʻrinishda boʻlish) hamda 195-moddasi (Ichki ishlar organlari xodimlarining oʻz xizmat burchlarini bajarishlariga qarshilik koʻrsatish)da nazarda tutilgan huquqbuzarliklarni sodir etishda aybdor deb topilgan. Unga BHMning 10 baravari (3 mln 400 ming soʻm) miqdorida jarima jazosi va 15 sutka maʼmuriy qamoq jazosi tayinlangan. 

Bundan tashqari, 23 iyul kuni ham Qoʻyliq dehqon bozori yerosti yoʻlida yuzini berkitib, ayollar kiyimini kiyib olgan erkak IIO xodimlari tomonidan ushlangan. Mazkur fuqaroga 7 sutka maʼmuriy qamoq hamda 3,4 mln soʻm jarima jazosi tayinlangan. 

Yuqorida keltirilgan fuqarolarning nima sababdan ayollarning kiyimini kiyinib, yuzini berkitgani ochiqlanmagan. Hozirda mazkur holatlar odamlar tomonidan turli talqinlarga sabab boʻlmoqda. Hatto ular orasida bunday hodisalar ataylab urishtirilayotganini taʼkidlayotganlar ham bor. 

Maʼlumot uchun, 2023 yilning 31 oktabr kuni Oʻzbekistonda jamoat joylarida yuzni toʻsib yurishga qarshi qonun kuchga kiritilgan. Maʼmuriy javobgarlik toʻgʻrisidagi kodeksning yangi 184-4-moddasiga asosan burqa yoki niqob taqqanlarga nisbatan ish ochilishini taʼkidlangan.