Samarqandda ayol farzandini hojatxonada dunyoga keltirdi

Unga ko‘ra, shifoxona hojatxonasidan chaqaloq yig‘isini eshitgan shifokor shu atrofdagi ichki ishlar xodimlariga murojaat qilgan. Shundan keyin xodimlar kelib, zudlik bilan yon tomondan xandaq qazib, ikki soat davomida chaqaloqni olib chiqishga uringan. 

Chaqaloqni qutqarib qolgan inspektor Sardor Safarov hodisani eslar ekan, uni saqlab qolish uchun faqatgina bir o‘zi emas, balki boshqa xodimlar ham birgalikda harakat qilganini aytib o‘tdi.

"Shu chaqaloqning umrini saqlab qolish uchun qo‘limizga nima ilashsa, shuni oldik. Tuynuk kovlarkanmiz, har kovlaganimizda chaqaloq ovozi eshitilmay qolar edi. Keyin bu yerda hamma xodimlar birgalikda jon koyitib kovlashdi. Yer qattiq, tog‘li hudud, bir amallab kovladik. Hamma xodimlar u yerda kirishga tayyor turgan edi, faqat tuynuk sal kichikroq bo‘lganligi uchun birinchi bo‘lib o‘zim kirdim", deydi u.

Uning qo‘shimcha qilishicha, chuqurda chaqaloq yonboshlanib, oyoq-qo‘llari qimirlamay qolgan. Chuqurdan chiqarilganidan keyin birinchi tibbiy yordam ko‘rsatish uchun hamshiralarga, shifokorlarga berilgan. 

1-mart kuni soat 12:00 lar atrofida Nurobod tumani markaziy shifoxonasiga olib kelingan chaqaloq shifokorlarning doimiy nazoratiga olingan. U hozirda intensiv xonada saqlanmoqda. 

"Kelganda juda ham bola muzlab ketgan edi, hozirda ahvolda ancha yaxshi. Hozir bolaning onasi ham o‘zini ancha yaxshi his qilib, bizni bergan savollarimizga u yaxshi javob beryapti", deydi shifokor Farmon Qo‘shmurodov.

Ammo holatning ajablanarli tomoni shundaki, ona beshinchi farzandiga homilador bo‘lganligini o‘zi bilmagan.

"Homilador bo‘lganimni bilmayman, rosti-da. Homiladorlik davrida ham toksikoz bo‘lmadim. Shu davr ichida poliklinikaga borganim yoq, uyda bo‘ldim", deydi ayol.