Serbiyada 29 mingga yaqin odam hukumatga qarshi namoyishga chiqdi

Qayd etilishicha, namoyish noyabr oyida Novi-Sad shahridagi temir yoʻl vokzalining tom qismi qulashi oqibatida yuz bergan koʻngilsiz voqea sabab sodir boʻlmoqda. 

Shu yilning 1 noyabr kuni Novi-Sad shahridagi temir yoʻl vokzali qayta taʼmirlanishiga qaramasdan, uning tom qismi qulab tushgan. Hodisa oqibatida 15 kishi halok boʻlgan. 

Talabalar va mamlakat fuqarolari ishtirokida uyushtirilgan norozilik namoyishi qurbon boʻlganlarning xotirasiga 15 daqiqalik sukut saqlashdan boshlangan. Shundan soʻng, ular quloqni kar qiluvchi hushtaklar va boshqa uskunalar yordamida shovqin koʻtargan hamda Slaviya maydonini egallab, tirbandliklar keltirib chiqargan. 

Namoyish ishtirokchilari hokimiyatni korrupsiyada va taʼmirlash ishlarini yetarlicha nazorat olib bormaganlikda ayblamoqda. Ular Novi-Sad shahri hokimining isteʼfoga chiqishini hamda aybdor deb topilganlarni jinoiy javobgarlikka tortilishini talab qilmoqda. 

Talabalar ishtirokida boshlangan norozilik namoyishlariga muxolif deputatlar, sanʼatkorlar, akademiklar va boshqa guruhlar qoʻshilgan. Mamlakatdagi ushbu hodisa sababli koʻplab universitetlar bir necha haftaga yopildi. 

Serbiya Prezident Aleksandr Vuchich namoyishchilar talabiga binoan vokzal qurilishi va taʼmirlanishi bilan bogʻliq barcha hujjatlarni ochiq taqdim etgan, biroq norozilik qatnashchilari eʼlon qilingan hujjatlar toʻliq emas, deb daʼvo qilmoqda. 

Shuningdek, ular avvalgi namoyishlarda qoʻlga olinganlarni ham ozod qilishni talab qilmoqda. Shundan soʻng, Prezident Vuchich namoyishchilarning talablarini bajarilganligini aytib, ularni darsga qaytishga chaqirgan.