Shavkat Mirziyoyev OTB bilan sheriklikni yanada kengaytirish muhimligini taʼkidladi

Uchrashuv avvalida vitse-prezident Inmin Yang Oʻzbekiston rahbariga OTB rahbari Masato Kandaning salomi va eng ezgu tilaklarini yetkazdi hamda forum muvaffaqiyatli oʻtkazilgani bilan tabrikladi.

Yangi Oʻzbekistonda ortga qaytmas tus olgan islohotlar strategiyasini amalga oshirish doirasida ushbu yetakchi xalqaro moliyaviy institut bilan hamkorlikni chuqurlashtirishning amaliy jihatlari koʻrib chiqildi.

Keyingi yillarda hamkorlikda yuksak darajaga erishilgani alohida mamnuniyat bilan qayd etildi. Bugungi kunda "yashil" energetika, transport, raqamli transformatsiya, taʼlim va boshqa yoʻnalishlardagi loyihalar portfeli 14 milliard dollarni tashkil etmoqda.

Oʻzbekiston yetakchisi OTB bilan infratuzilma, davlat-xususiy sheriklik, biznes, ijtimoiy soha va kapital bozorini rivojlantirish boʻyicha yangi loyihalarni oʻz ichiga olgan keng koʻlamli strategik sheriklik dasturini tayyorlash muhimligini qayd etdi.

Kambagʻallikka qarshi kurashish, muhim minerallarni qayta ishlash, byudjetni qoʻllab-quvvatlash, qoʻshma investitsiya platformasini yaratish boʻyicha loyihalarni ilgari surishga alohida eʼtibor qaratildi.

Shuningdek, bank Boshqaruvchilar kengashining yillik yigʻilishiga tayyorgarlik koʻrish va uni kelgusi yilda Oʻzbekistonda oʻtkazish chora-tadbirlari muhokama qilindi.