Oʻzbekiston – AQSh: ikki tomonlama bitimlar toʻplami imzolandi

Tadbirda AQSh hukumati va moliya institutlari vakillari — savdo vakili Jeymison Grir, Prezidentning maxsus vakili Paolo Zampolli, Eksimbank prezidenti va raisi Jon Yovanovich, AQSh – Oʻzbekiston savdo palatasi raisi Kerolin Lemm hamda “Traxys”, “Valmont Industries”, “Gulf Oil”, “Avigen Broiler Breeding Group”, “John Deere”, “BlackRock Financial Markets Advisory”, “Oppenheimer” kabi yetakchi kompaniyalar rahbarlari qatnashdi. 

Videoaloqa orqali Oʻzbekiston hududlari rahbarlari ham uchrashuvda ishtirok etdi.

“Bugungi kunda sheriklar ishonchli, qoidalar aniq-ravshan, hamkorlik esa uzoq muddatli boʻlishi yetakchi oʻringa chiqmoqda. Biz AQSh bilan hamkorligimizni aynan shu mantiq asosida qurmoqdamiz”, dedi Davlat rahbari.

Qoʻshma Shtatlar bilan hamkorlikda ustuvor yoʻnalishlar sifatida xomashyo, neft-kimyo, energetika, qishloq xoʻjaligi, parrandachilik va boshqa tarmoqlar belgilandi.

AQSh Xalqaro moliyaviy taraqqiyot korporatsiyasi va Eksimbankining bitimlarga hamrohlikdagi roli ortishi alohida qayd etildi.

Hududlararo aloqalarni mustahkamlash maqsadida Oʻzbekiston hududlari rahbarlarining AQShning hamkor shtatlariga tashriflari tashkil etish topshirildi.

Davlat rahbari huzurida quyidagi sohalar boʻyicha ikki tomonlama hujjatlar imzolandi:

• yoqilgʻi quyish shoxobchalari tarmogʻini qurish;
• yomgʻirlatib sugʻorish texnologiyalarini joriy etish;
• muhim minerallarni qazib olish va yetkazib berish;
• parrandachilik klasterini tashkil etish;
• agrosanoat va moliya bozorini rivojlantirish;
• investitsiya muhitini yaxshilash.