Oʻzbekiston va YeI munosabatlari yangi strategik bosqichga koʻtarildi

Uchrashuvda joriy yil aprel oyida Samarqandda oʻtgan «Markaziy Osiyo – Yevropa Ittifoqi» birinchi sammitida erishilgan kelishuvlarni amalga oshirish hamda koʻp qirrali Oʻzbekiston–YeI hamkorligini yanada kengaytirish masalalari muhokama qilindi.

Yetakchilar bugun imzolangan Kengaytirilgan sheriklik va hamkorlik toʻgʻrisidagi bitimni yuqori baholadilar. Ushbu tarixiy hujjat ikki tomonlama munosabatlarning huquqiy asoslarini kengaytirish, shu bilan birga, yangi strategik kun tartibini belgilab berishini taʼkidladilar.

Bitim Yevropa Ittifoqiga aʼzo davlatlar bilan, xususan, savdo, investitsiyalar, transport, energetika, iqlim, yuqori texnologiyalar va madaniy-gumanitar hamkorlik sohalarida aloqalarni yangi bosqichga olib chiqishi kutilmoqda.

Tomonlar Oʻzbekistonning Jahon savdo tashkilotiga aʼzoligi boʻyicha muzokaralar yakunlanganini ham olqishladilar.

Tashrif arafasida Oʻzbekiston delegatsiyasi Yevropa Ittifoqining «Global darvoza» forumida ishtirok etdi, shuningdek, Hamkorlik kengashi hamda Iqtisodiyot, savdo va investitsiyalar boʻyicha kichik qoʻmita yigʻilishlari oʻtkazildi.

Kecha Bryusselda yirik qoʻshma biznes forumi boʻlib oʻtdi. Bugun esa Yevropaning yetakchi kompaniyalari va moliyaviy tuzilmalari rahbarlari bilan uchrashuv oʻtkazildi. Unda energetika, kimyo, muhim minerallar, logistika, toʻqimachilik va farmatsevtika sohalarida umumiy qiymati 10 milliard yevrodan ziyod boʻlgan yangi loyihalarni amalga oshirish boʻyicha kelishuvga erishildi.

Bu hozirda Yevropa kompaniyalari ishtirokidagi 40 milliard yevrodan ziyod investitsiya portfeliga salmoqli qoʻshimcha boʻladi.

Shuningdek, sheriklikning yuqori surʼatini saqlab qolish uchun institutsional mexanizmlarni mustahkamlash, yangi istiqbolli loyihalarni ilgari surish hamda viza tartibotlarini soddalashtirish orqali ishbilarmonlik va insonlar aloqalarini kuchaytirish zarurligi qayd etildi.

Uchrashuv yakunida Qoʻshma bayonot qabul qilindi.