Prezident sobiq maslahatchisi, marhum Rustam Qosimov orden bilan mukofotlandi

“Mamlakatimiz mustaqilligini va uning maʼnaviy asoslarini mustahkamlash, oʻzining katta bilim va salohiyati, tashabbuskorlik va tashkilotchilik fazilatlari bilan yurtimizda sogʻliqni saqlash, taʼlim-tarbiya, ilm-fan, diplomatiya, madaniyat va sport sohalarini rivojlantirish, yuqori malakali kadrlarni tayyorlashga qoʻshgan ulkan hissasi, jamiyatimizda tinchlik va barqarorlik, millatlar va dinlararo doʻstlik va hamjihatlikni kuchaytirish, milliy va umumbashariy qadriyatlarni keng targʻib etish, yosh avlodni Vatanga muhabbat va sadoqat ruhida tarbiyalash yoʻlida koʻrsatgan jonbozligi hamda tavalludining 70 yilligi munosabati bilan taniqli davlat va jamoat arbobi, olim va pedagog, marhum Qosimov Rustam Sobirovich «Fidokorona xizmatlari uchun» ordeni bilan mukofotlansin”, — deyiladi xabarda.

Xoʻsh, marhum amaldor Rustam Qosimov aslida oʻzi kim va nima uchun bu ordenga loyiq koʻrildi?

Rustam Qosimov 1956 yilda Toshkent shahrida tugʻilgan. Faoliyati davomida oliy va oʻrta maxsus taʼlim vazirining birinchi oʻrinbosari (2001—2004 yillar) va oliy va oʻrta maxsus taʼlim vaziri (2004—2009 yillar), Jahon iqtisodiyoti va diplomatiya universiteti rektori (2009—2011 yillar), shuningdek, 2004 yildan 2009 yilga qadar bosh vazirning taʼlim, sogʻliqni saqlash, ijtimoiy soha va yoshlar siyosati boʻyicha oʻrinbosari lavozimlarida ishlagan.

2011 yildan 2016 yilga qadar nafaqada boʻlgan. 2016 yilning 16 sentabridan yana bosh vazir oʻrinbosari hamda oliy va oʻrta maxsus taʼlim vaziri etib tayinlangandi. 2017 yilning iyunidan 2018 yilgacha Prezidentning fan, taʼlim, sogʻliqni saqlash, sport boʻyicha davlat maslahatchisi, Davlat va jamiyat qurilishi akademiyasi rektori lavozimida faoliyat yuritgan.

2018 yilning 31 iyulidan Prezidentning jamoat va diniy tashkilotlar bilan aloqalar boʻyicha davlat maslahatchisi, 2019 -2021 yillarda Oʻzbekiston xalqaro islom akademiyasi rektori sifatida ishlagan. U 2021 yil 7 may kuni olamdan koʻz yumgan.