Eldor Shomurodov yana Konferensiyalar Ligasida – bu safar “Istanbul Bashakshehir” bilan

Oʻtgan mavsum UEFA Konferensiyalar Ligasida “Istanbul Bashakshehir” 6 uchrashuvda atigi bitta gʻalaba va 3 durang qayd etib, 26-oʻrinni egallagan va pley-off bosqichiga yoʻl ola olmagandi. Endilikda, oʻz vaqtida bu musobaqada chempionlikni qoʻlga kiritgan Eldor Shomurodov yana ushbu turnirda maydonga tushadi — bu safar Turkiya klubi safida.

2022 yilda “Roma” tarkibida Konferensiyalar Ligasi tarixidagi ilk gʻolib boʻlgan Shomurodov, finalda “Feynoord” ustidan 1:0 hisobidagi gʻalaba qozongan edi. U butun turnir davomida 9 oʻyinda maydonga tushib, 2 bor golli uzatma muallifi boʻlgan. Yevropa Ligasida esa Eldor 10 oʻyinda 3 ta gol urib, 1 ta golli uzatma qayd etgan.

“Bashakshehir” 2025/26 yilgi UEFA Konferensiyalar Ligasining ikkinchi saralash bosqichida ishtirok etadi. Ularning ilk raqibi — Bolgariyaning “Cherno More” klubi boʻladi. Bellashuv 24 iyul kuni, Toshkent vaqti bilan soat 22:00 da, Varna shahrida boʻlib oʻtadi. Bu jamoalar tarixda ilk marta oʻzaro toʻqnash kelishmoqda.

“Bashakshehir” yozgi tayyorgarlik jarayonida ijobiy natijalar qayd etdi, biroq bu bahs ular uchun yangi mavsumdagi ilk rasmiy sinov boʻladi.

“Cherno More” esa aynan shu bosqichda oʻtgan yili musobaqani tark etgandi. Bu safar ular oʻz maydonida, oʻz muxlislari qarshisida gʻalaba qozonishga harakat qiladi. Bolgariya klubi tayyorgarlik doirasida oʻtkazgan soʻnggi yetti oʻyinda ketma-ket gʻalaba qozongan. Ichki chempionatni esa “Lokomotiv Sofia” bilan 1:1 hisobida boshladi.