“Grand Swiss 2025”da kimning imkoniyati qanday?

Bugungacha turnirda ishtirok etish uchun talabnomalarni taqdim etgan oʻnlab jahon shaxmatining yorqin vakillari qadim shaharga yetib keldi.

Xoʻsh, 2026 yilgi jahon chempionatiga yoʻllanmalar taqdim etadigan Samarqand bahslarida kimlarning imkoniyati yuqori-yu, aynan qaysi shaxmatchilarning oʻyinlarini kuzatib borish lozim boʻladi?

Albatta, turnirda dona suradigan 116 nafar erkak va 56 nafar xotin-qiz shaxmatchining har biri oʻziga xos jozibali oʻyin koʻrsatishi shubhasiz.

Ammo ular orasida “Grand Swiss 2025” turnirining birinchi raqamli ishtirokchisi Rameshbabu Praggnanandxa, amaldagi jahon chempioni Dommaraju Gukesh, yaqinda Hindistonda oʻtkazilgan nufuzli turnirda gʻoliblikka erishgan germaniyalik Vinsent Kaymer, 2021 yilgi “Grand Swiss” gʻolibi Aliriza Firuzja qatorida Anish Giri, Vidit Santosh Gujrati, Nodirbek Abdusattorov, Levon Aronyan kabi oʻnlab vunderkindlarning har bir oʻyini klassik shaxmatning shiddatini koʻrsatib berishi bilan ahamiyatli sanaladi.

Ayollar oʻrtasidagi bahslarda xitoylik Chjuni Tan, ukrainalik Anna Muzichuk, qozogʻistonlik Bibisora Asaubayeva, rossiyalik Katerina Lagno, hindistonlik Xarika Dronavalli qatorida hamyurtlarimiz Afruza Hamdamova, Umida Omonova, Gulruhbegim Tohirjonova ishtirokidagi bahslar shaxmat ixlosmandlarining eʼtibor markazida boʻlishi shubhasiz.

Eslatib oʻtamiz, “Grand Swiss 2025”ning erkaklar musobaqasida hamyurtlarimizdan Nodirbek Abdusattorov, Javohir Sindorov, Nodirbek Yoqubboyev, Shamsiddin Vohidov, Muhiddin Madaminov, Jahongir Vohidov, Muhammadzohid Suyarov, Ortiq Nigʻmatov, Abdumalik Abdusalimov, ayollar guruhida Gulruhbegim Tohirjonova, Afruza Hamdamova, Umida Omonova, Guldona Karimova va Madinabonu Xalilova gʻoliblik yoʻlida dona suradi.