JCh-2025. Oʻzbekistonlik yetti bokschidan yetti gʻalaba

Bokschilarimiz jangni -54 kg vazn toifasida boshlashdi — Nigina Oʻktamova vengriyalik Anna Lakotarni magʻlub etib (5:0), chorak finalga yoʻl oldi. U 10 sentabrda keyingi bosqich yoʻllanmasi uchun ringga koʻtariladi.

Navbahor Hamidova (-65 kg) esa belgiyalik Oshin Deriuvdan ustun keldi (4:1).

Shavkatjon Boltayev ogʻir jangda ispaniyalik Bernad Martinezni yengib (3:0), chorak finalga chiqdi.

Toʻrabek Habibullayev (-90 kg) yunon bokschisi Vagkan Nanitzanianni yengdi (5:0) va chorak finalda qozogʻistonlik Sagʻindik Togʻambayga qarshi jang oʻtkazadi.

Olimpiada chempioni Abdumalik Xalokov (-60 kg) italiyalik Juzeppe Kanonikoga qarshi bahsni gʻalaba bilan yakunlab, jahon chempionligi sari yana bir qadam tashladi

-75 kg vaznda boʻlib oʻtgan jangda Fazliddin Erkinboyev turkiyalik Sultan Osmanlini 5:0 hisobida magʻlubiyatga uchratib, chorak final yoʻllanmasi egasiga aylandi.

Boks oqshomining vakillarimiz ishtirokidagi soʻnggi jangida +90 kg vazn toifasidagi Jahongir Zokirov germaniyalik Nikita Putilov ustidan zafar quchdi.

Shu tariqa dushanba kuni Oʻzbekiston sharafini himoya qilgan yetti nafar bokschining barchasi 100 foiz natija qayd etdi.

Maʼlumot uchun: World Boxing shafeligida ilk bor oʻtkazilayotgan kattalar oʻrtasidagi jahon chempionatida 68 mamlakatdan 554 nafar bokschi qatnashmoqda. Turnir 14 sentabr kuni yakuniga yetadi.