Olimpiada kundaligi: Yana bir medal qoʻlga kiritildi

Dastlab +100 kg vazn toifasida bahslarga kirishgan dzyudochi Alisher Yusupov oʻtish oʻyinida gruziyalik Guram Tushishvili bilan kurashishi kerak edi. Ammo Tushishvili  diskvalifikatsiya qilingani uchun Alisher toʻgʻridan-toʻgʻri keying bosqich yoʻllanmasiga ega chiqdi. Alisher Yusupov Olimpiadaning bronza medali oʻrtaga tikilgan bahsida yaponiyalik jiddiy raqib Tatsuro Saitoni magʻlub etib Oʻzbekiston delegatsiyasiga navbatdagi medalni taqdim etdi. 

Ayollar oʻrtasida boks bellashuvlarida ishtirokini davom ettirayotgan Sitora Turdibekova oʻzining chorak final bahsini oʻtkazdi. Bu bosqichda unga ikki karra jahon chempioni Xitoy Taipeyi vakili Yu Ting Lin raqib boʻldi. Oʻta qizgʻin kechgan bellashuvda ochkolar hisobiga Sitora Turdibekova raqibiga imkoniyatni boy berdi va Olimpiadadagi ishtirokini yakunladi.
     Kechga yaqin erkaklar oʻrtasidagi bahslarda 3 nafar oʻzbek boks vakillari ringa koʻtarildi. Birinchi jangda raqibiga hech qanday imkoniyat qoldirmay chorak final yoʻllanmasini qoʻlga kiritgan, Tokio Olimpiadasi chempioni Bahodir Jalolov(+92)  avstraliyalik Teremoana Teremoanaga qarshi jang qildi. Bahodir Jalolov ortda qolgan 3 raundda raqibiga hech qanday imkoniyat qoldirmadi va yakunda yarim final yoʻllanmasini qoʻlga kiritdi. Yarim finalda unga germaniyalik  Nelviye Tiafak raqib boʻladi. Navbatdagi jang Rio-2016 yozgi Olimpia oʻyinlari gʻolibi Hasanboy Doʻsmatov va Saken Bibossinov oʻrtasida boʻldi. Boks professori deb nom olgan Hasanboy qozogʻistonlik sportchi ustidan gʻalaba qozonib medalni naqd qildi. Kunning soʻngi oʻyinida delegatsiyamizning eng yosh bokschisi Toʻrabek Habibullayev -80kg vazn toifasida kuchli raqib ikki karra Olimpiada chempioni, jahon chempioni kubalik Arlen Lopes bilan jang olib bordi. 20 yoshli hamyurtimiz Arlen Lopesga imkoniyatni boy berdi.
     Hozircha uch bokschimiz Lazizbek Mullajonov, Bahodir Jalolov va Hasanboy Doʻsmatov yarim final egasi boʻlib turibdi. Bugun ringa chiqadigan Abdumalik Xalokov(-57kg), Asadxoʻja Moʻydinxoʻjayev(-71) va Navbahor Hamidova(-66kg) yarim final uchun kurashadi. Hamyurtlarimizga bu janglarda omad tilaymiz.
Eslatib oʻtamiz, Oʻzbekiston Olimpia delegatsiyasi jami 3ta, 1ta oltin 2ta bronza medallari bilan reytingda 26-oʻrinda ketmoqda.