TOP-5 chempionatlarining yangi mavsumiga start berildi

Bu safar ham oʻtgan mavsumdagidek Ispaniya La Ligasi birinchilardan boʻlib tur oʻyinlarini boshladi. Kechki bahslardan oʻrin olgan ikki oʻyinga tashrif buyurgan muxlislar sonidan kelib chiqadigan boʻlsak, yevropaliklar futbol oʻyinlarini ancha sogʻingan. Birinchi tur oʻyini oʻtgan mavsumda La Ligani 5-oʻrinda yakunlagan "Atletik Bilbao" hamda "Xetafe" jamoalari oʻrtasida kechdi. 

Shiddatli kechgan bahsda jamoalar murosa koʻchasini tanladi va yakunda hisob 1:1 boʻldi. Turning ikkinchi bahsida "Betis" oʻz uyida oʻtgan mavsumda furvort koʻtargan "Jirona" jamoasini qabul qildi. Bu oʻyin ham 1:1 hisobida yakunlandi. La Liganing bugungi bahslariga ikkita oʻyin rejalashtirilgan. Dastlab "Selta" oʻz uyida "Alaves" jamoasiga qarshi maydonga tushsa, 16 avgustdan 17 avgustga oʻtar kechasi muxlislar "Las Palmas" va "Sevilya" jamolarining oʻyinini guvohi boʻladi. Qolgan oʻyinlar boshqa kunlarga rejalashtirilgan. 

Shuningdek, oʻtgan mavsumda biroz omadi yurishmagan "Manchester Yunayted" va "Fulxem" jamoalari oʻrtasidagi oʻyin APLda ham birinchi tur oʻyinlarini boshlab beradi. Muxlislar ertaga debyutant jamoa "Ipsvich Taun" va "Liverpul", "Arsenal" hamda "Vulves", "Everton" hamda "Brayton" va shunga oʻxshagan bir qancha jamoalar ishtirokidagi o'yinning guvohi bo'ladi. 18 avgust kuni oʻtgan mavsum chempioni "Manchester Siti" mehmonda Londonning "Chelsi" klubiga qarshi maydonga tushadi. Bu bahs mutaxassislar tomonidan turning markaziy oʻyini deya baholanmoqda. 

Fransiya 1-Ligasi oʻyinlari ham bugun boshlanadi. 16 avgustga faqatgina "Gavra" hamda PSJ jamoalari oʻrtasidagi oʻyin rejalashtirilgan. Turning qolgan oʻyinlari ertaga boʻlib oʻtadi. 

Italiya A Seriyasida 1-tur oʻyinlariga ertadan start beriladi. Mavsumning ochilish oʻyinini "Jenoa" va "Inter" jamoalari oʻrtasidagi bahs boshlab beradi. Bundan tashqari, ertaga "Parma" hamda "Fiorentina", "Empoli" va "Monsa", "Milan" hamda "Torino" kabi jamoalarning oʻzaro oʻyinlari oʻtkaziladi. 

TOP 5 chempionatlar ichida mavsumni Bundesliga oxirgi boʻlib boshlaydi. Bu oʻyin 23 avgust kuni "Borussia Myunxengladbax" va oʻtgan mavsum kashfiyoti "Bayer" klublari oʻrtasida boʻlib oʻtadi. 

Maʼlumot uchun,  oʻtgan mavsum APL chempionligini "Manchester Siti", La Liga chempionligini "Real Madrid", A Seriya gʻolibligini "Inter", Bundesliga gʻolibligini "Bayer" va Liga 1 chempionligini "Paris Sain-German" jamoalari qoʻlga kiritgan edi.