Tashabbusli byudjetda gʻolib boʻlmagan maktablarga ham mablagʻ ajratiladi

Maktabgacha va maktab taʼlimi vazirligi 2023 yil yakuni boʻyicha hisobot matbuot anjumani oʻtkazdi. Paradigma.uz muxbiri vazirlik masʼullariga oxirgi paytlarda ijtimoiy tarmoqlarda tarqalayotgan oʻqituvchi va oʻquvchi oʻrtasidagi kelishmovchilik holatlariga vazirlik munosabatini soʻradi. Bundan tashqari, 2024 yilgi davlat byudjetidan Maktabgacha va maktab taʼlimi vazirligiga ajratilgan mablagʻlar hisobidan maktablarni jihozlash uchun Tashabbusli byudjet loyihasida 1,5 mingdan ortiq ovoz yigʻgan va gʻolib boʻla olmagan maktablarga alohida mablagʻ ajratilishi belgilangan ekan. Bu boʻyicha ham qanday ishlar qilinayotgani haqida ham javob oldi.

Maktabgacha va maktab taʼlimi vaziri maslahatchisi Azizbek Turdiyev ijimoiy tarmoqlarda tarqalayotgan maktablardagi koʻngilsiz holatlarga nisbatan "Barcha holatlar nazoratga olingan, bu boʻyicha ijtimoiy tarmoqlarda ham xabar berib boryapmiz" mazmunida javob berdi. Lekin vazirlikning na rasmiy sayti, na telegram sahifasida ushbu holatlarga nisbatan hech qanday munosabat berilmagan. Vazirlikning ijtimoiy tarmoqlari faqat yutuqlarni koʻrsatish uchun ochilgandek, goʻyo.

Tashabbusli byudjet boʻyicha savolga vazirlikning Moliya va iqtisod departamenti direktori Ilhom Sirajov, davlat byudjeti hisobidan ajratilgan mablagʻlar maqsadli sarflanayotganini, Tashabbusli byudjet boʻyicha jihozlash bilan bogʻliq loyihalarda 1,5 mingdan ortiq ovoz yigʻgan maktablarga vazirlik tomonidan mablagʻ ajratilishini aytib oʻtdi.

Tashabbusli byudjet loyihasi yakunlanishiga 1 kun vaqt qoldi. Ijtimoiy tarmoqda Samarqandda oʻqituvchilar darsdan ozod qilinib ovoz yigʻib yurgani aks etgan video tarqalmoqda. Xalq orasida alohida mavsumga aylangan loyihaga kiritilayotgan yoʻl, kasalxona, maktablar birlamchi ehtiyoj sifatida taʼmirlab berilishi kerak emasmi? Taʼmirlab berilmagan taqdirda ham ushbu loyihaga maktablar va shifoxonalarning kiritilishi, hamda oʻqituvchilar, shifokorlarning ovoz yigʻishga jalb qilinishi qanchalik toʻgʻri?