Litva hukumati Markaziy Osiyodan kelgan muhojirlardan xavotirga tushmoqda

Davlat xavfsizlik departamenti rahbari Daryus Yaunishkisga koʻra, 2021 yildan beri Litvada Markaziy Osiyodan kelgan muhojirlar soni 14 baravarga koʻpaygan. Bu esa odamlarning radikallashishga moyilligi bilan bogʻliq xavotirlarni keltirib chiqarmoqda.

"Departament mamlakatga kelgan barcha muhojirlarni tekshirishga ulgurmayapti, bu esa kontrrazvedka va terrorizmga qarshi kurash sohasida katta xavf tugʻdirmoqda. Ayni paytda biz migrantlarda oʻzini namoyon qilishi mumkin boʻlgan tahdidni koʻrmayapmiz, ammo antisemitizm va gʻarbga qarshi kayfiyatlar bilan birga radikallashuv tendensiyasi ularda mavjud", dedi u.

Mamlakat Bosh vaziri Ingrida Shimonite ham "Ziniu radijas" radiosida bergan intervyusida Rossiya – Ukraina urushi boshlanishidan avval mamlakat mehnat bozorini Ukraina hamda Belorusdan kelgan erkak migrantlar egallaganini, ammo urushda ularning jalb qilinishi ortidan mehnat bozori boʻshab qolganini, shundan soʻng Markaziy Osiyodan kelganlar bu bozorni toʻldirganini aytgan. 

Litva Migratsiya departamenti maʼlumotlariga koʻra, joriy yilning 1 oktabr holati boʻyicha, Litvada 10,6 ming nafar Oʻzbekiston fuqarosi istiqomat qiladi (bu raqamlar Litvada yil boshida 8,2 ming, 2022 yil boshida esa, 998 nafar boʻlgan). 

Litvadagi eng katta xorijiy diaspora sifatida ukrainlar (77,5 ming kishi), ikkinchi oʻrinda beloruslar (61,3 ming kishi) va uchinchi oʻrinda ruslar (15,3 ming kishi) qayd etilgan. Toʻrtinchi oʻrinni esa oʻzbeklar egallagan. Shuningdek, mamlakatda tojik diasporasi ham toʻqqiz oy ichida 5,7 mingdan 7,2 ming nafarga koʻpaygan.

Daryus Yaunishkis mamlakat fuqarolariga bu raqamlarlardan qoʻrqmaslik kerakligini, bunga sabab sifatida migrantlar sonining oʻsishiga qaramay muhojirlarning umumiy soni hali ham kam foizni tashkil qilayotganligini aytib oʻtgan. U telekanalda bergan intervyusi davomida joriy yil boshidan 1 oktabrga qadar Litvada vaqtinchalik yashash uchun ruxsatnoma olgan muhojirlarning soni bor-yoʻgʻI bir necha yuz kishini tashkil qilishini taʼkidlagan.