Toshkentda MIB xodimlariga jinoyat ishi qoʻzgʻatildi

Qayd etilishicha, agentlik Shayxontohur tuman  Majburiy ijro byurosini tekshirgan. Oʻrganishlar davomida mazkur byuroda ishlaydigan mansabdor shaxslar ish yurituvidagi ijro hujjatlarini asossiz tamomlash oqibatida ijro ishlarida qonunbuzilishi holatlariga yoʻl qoʻyilgani maʼlum boʻlgan. 

Jumladan, byuroning tuman boʻlimi ish yurituvchisi "S.B." MChJdan davlat foydasiga 19 mlrd soʻmlik, "P.P." MChJdan 179,2 mln soʻm soliq qarzdorligini undirish toʻgʻrisidagi ijro ishlari qonunchilik talablariga zid ravishda asossiz tugatilgan. Buning oqibatida ushbu soliqchining qarzdorligi bugungi kunga qadar undirilmagan. 

Shuningdek, "S.C.G." MChJ dan 26,3 mlrd soʻm, "R.F.P." MChJdan 19,4 mlrd soʻm va "Ya.M.S.E.T" MChJdan 1,7 mlrd soʻm davlat foydasiga soliq qarzdorliklarini undirish toʻgʻrisidagi ijro ishlari mazkur korxonalar faoliyat yuritib kelayotgan manzili aniq boʻla turib, asossiz tamomlangan. 

Shu kabi "P.E.E.S." MChJdan undiruvchi "B.P.T." MChJning foydasiga jami 1,9 mlrd soʻm, "M.S." MChJdan undiruvchi "S." AJning foydasiga 1,1 mlrd soʻm qarzdorliklarni, qarzdor B.P.dan undiruvchi N.G.ning foydasiga 332 mln soʻm jinoyat ortidan yetkazilgan zararni, qarzdor  "M.T." MChJdan  davlat foydasiga 6,3 mlrd soʻm va 331 mln soʻm soliq qarzdorligini undirish toʻgʻrisidagi ijro ishlari qarzdorning nomiga rasmiylashtirilgan mol-mulklar mavjud boʻla turib, asossiz yakunlangan. 

Mazkur holatlar yuzasidan oʻrganish mobaynida toʻplangan hujjatlar asosida Toshkent shahar prokuraturasi tomonidan Jinoyat kodeksining tegishli moddalari bilan jinoyat ishi qoʻzgʻatildi. Hozirda ularga nisbatan tergov harakatlari olib borilmoqda.