Toshkentda yoʻl harakatini boshqarish boʻyicha yangi markaz ish boshlaydi

Bu Prezidentning «Toshkent shahrida transport tizimi boshqaruvini takomillashtirish hamda tirbandliklarning oldini olishga qaratilgan qoʻshimcha chora-tadbirlar toʻgʻrisida»gi qarorida belgilandi.

Markazning asosiy vakolatlari

Qarorga koʻra, markaz quyidagi manbalardan maʼlumot olish huquqiga ega boʻladi:

— vazirliklar va idoralar,
— Toshkent shahri va viloyati hokimliklari,
— yoʻlovchi tashuvchi korxonalar,
— elektromobil quvvatlash stansiyalari,
— toʻxtash joylari operatorlari,
— mikromobil vositalari ijarasi xizmatlari,
— boshqaruvchi kompaniyalar va boshqa muassasalar.

Markazga qoʻshimcha ravishda:

— ayrim yoʻl uchastkalarida harakat tezligi rejimini belgilash,
— ayrim transport turlarining, jumladan yuk mashinalarining harakatiga cheklov oʻrnatish,
— foto va video qayd etish vositalari orqali aniqlanadigan qoidabuzarliklar roʻyxatini shakllantirish, ularga jarimalar boʻyicha takliflar kiritish,

vakolatlari beriladi.

Intizomiy javobgarlik boʻyicha taklif kiritish huquqi

Agar shahar yoʻl harakati bilan bogʻliq vazifalar lozim darajada bajarilmasa, markaz tegishli tashkilotlar rahbarlariga masʼul xodimlarni intizomiy javobgarlikka tortish toʻgʻrisida taklif berish imkoniyatiga ega boʻladi.

Vakolatlar oʻtkazilishi

2026 yil 1 iyuldan boshlab Toshkent shahar hokimligi, Transport vazirligi va IIVning ayrim vakolatlari yangi markazga oʻtkaziladi.
Markaz ushbu vakolatlardan 2028-yil 31-dekabrga qadar huquqiy eksperiment doirasida foydalanadi.

Shahar transportiga oid yirik loyihalar

Prezident qarorida, shuningdek, poytaxt infratuzilmasini kengaytirishga doir quyidagi rejalar belgilangan:

— Xitoy bankdan 271 mln dollar kredit jalb qilinadi — yoʻllarni rekonstruksiya qilish va yangi chorrahalar qurish uchun,
— 2030 yilgacha 150 ming oʻrinli toʻxtash joylari barpo etiladi,
— Toshkent metropoliteni uzunligi 103 kilometrga yetkaziladi,
— piyodalar va velosiped yoʻlaklari kengaytiriladi.