Turkiya Germaniya bilan mudofaa sohasida hamkorlikni kuchaytirishga harakat qilmoqda

"Mudofaa sanoatida duch keladigan cheklovlarni kun tartibimizdan butunlay olib tashlamoqchiman. Turkiya va Germaniya, ayniqsa, mudofaa sohasida qoʻshma ishlab chiqarish loyihalarini muhokama qiladi, deb umid qilamiz", - dedi Erdoʻgʻon hamkasbi Frank-Valter Shtaynmayer bilan oʻtkazilgan matbuot anjumanida.

2016-yildan beri Germaniya Turkiyaga qurol eksport qilishda bir qancha cheklovlarni kiritgan. Bunga sabab sifatida Turkiyaning Suriya shimolidagi Afrinda kurd militsiya guruhlariga, xususan, Xalq himoyasi boʻlinmalariga qarshi operatsiyasi koʻriladi.

Erdoʻgʻon, shuningdek, oʻzaro tovar ayirboshlash hajmini hozirgi 50 milliard AQSh dollaridan 60 milliard dollargacha oshirish zarurligini taʼkidladi.

Shtaynmayer, oʻz navbatida, Turkiya va Germaniya bir-biri uchun "ajralmas" ikki davlat va ular haqiqatan ham "bir-biriga muhtoj" ekanini aytdi.

“Biz juda qiyin paytlarda Turkiya-Germaniya munosabatlariga yana bir bor ahamiyat va turtki berishimiz kerak... Gʻazodagi gumanitar vaziyatni yaxshilashimiz kerak”, dedi Germaniya Prezidenti.

Davlat rahbarlari, falastinliklar uchun siyosiy yechim topilmasa, Isroil uzoq vaqt davomida tinchlikka erisha olmasligini taʼkidlashdi. "(Gʻazodagi) vaziyatning siyosiy yechimi faqat ikki xalq uchun ikki davlat tamoyilini amalga oshirishdan iborat boʻlishi mumkin", - deya pozitsiyasini bildirdi Frank-Valter Shtaynmayer.


Mustafo Yaxyoyev