Turkiyada Istanbul meri hibsga olinishi ortidan ommaviy namoyishlar boshlandi

Qayd etilishicha, namoyishchilar Istanbul shahar hokimligi, Imomoʻgʻli saqlanilayotgan politsiya boʻlimi, Istanbul universiteti va boshqa joylarda yigʻilib, turli shiorlar bilan mitinglar uyushtirmoqda. Mamlakat politsiyasi esa shahar hokimligini oʻrab olgan, yoʻllarning bir qismi hamda Taksimning markaziy maydonini toʻsib qoʻygan. 

"Bu toʻntarishga urinish boʻldi. Akrom Imomoʻgʻlining prezidentlikka nomzod boʻlish erkinligi tortib olinmayapti, bu millatdan uni saylash erkinligi tortib olinmoqda", deydi Respublika xalq partiyasi rahbari Ozgur Ozel shahar hokimligi binosida yigʻilganlar oldida qilgan nutqida.

Voqea joyidan olingan kadrlarga koʻra, politsiya Istanbul universiteti hududida talabalarni tarqatib yuborish uchun maxsus vositalardan foydalanmoqda. Ular Akrom Imomoʻgʻlining oliy maʼlumot toʻgʻrisidagi diplomi boʻlmagani uchun, prezidentlik saylovida ishtirok eta olmasligi qaroriga nisbatan norozilik bildirib chiqqan. Qaror siyosatchi hibsga olinishidan biroz oldin qabul qilingan. 

Yakshanba kuni boʻlib oʻtadigan Respublika xalq partiyasi qurultoyida Akrom Imomoʻgʻli 2028 yilda boʻlib oʻtadigan prezidentlik saylovlarida muxolifat nomzodi sifatida eʼlon qilinishi kutilgan edi. Turkiyada muddatidan oldingi saylovlar 2027 yil noyabr oyida boʻlib oʻtishi mumkin. 

Aytilishicha, Imomoʻgʻli korrupsiya va terroristik tashkilotlar bilan aloqadorlikda tergov qilinmoqda. Tergov doirasida 100 ga yaqin odam, jumladan siyosatchilar, jurnalistlar va ishbilarmonlar hibsga olingan. 

Imomoʻgʻli hibsga olingandan soʻng, uning ijtimoiy tarmoqlarida "xalq irodasini qoʻrqitish yoki noqonuniy harakatlar orqali bostirib boʻlmaydi”, degan bayonot paydo boʻldi.

"Men nafaqat Istanbulning 16 million aholisiga, balki Turkiyaning 86 million fuqarosiga, shuningdek, butun dunyoda demokratiya va adolatni qoʻllab-quvvatlayotgan barcha insonlarga ishonch bildirgan holda qatʼiy turibman", deya taʼkidlangan bayonotda.