Turkiya Saudiya Arabistonida harbiy baza quradi

“Türkiye” gazetasiga ko‘ra, Anqara yaqin haftalarda Saudiya Arabistoniga cheklangan tarkibdagi harbiy kontingent va harbiy texnika yuborishni rejalashtirmoqda.

Turkiya 2025-yildan buyon Saudiya Arabistonida muhim infratuzilma obyektlarini himoya qilish maqsadida 200 nafardan ortiq harbiy mutaxassis va texnik xodimni saqlab kelmoqda. Ular ixtiyorida havo hujumidan mudofaa hamda radioelektron kurash vositalari ham mavjud.

Nashr ma’lumotiga ko‘ra, 5-oktabr kuni Ar-Riyodda Makka alyansiga kiruvchi Pokiston, Saudiya Arabistoni va Turkiya harbiy kuchlarni joylashtirish hamda qo‘shma mudofaa majburiyatlarini amalga oshirishni boshlashga qaror qilgan.

Kelishuv doirasida Turkiya o‘rta va yaqin masofaga mo‘ljallangan havo hujumidan mudofaa tizimlari yordamida Saudiya Arabistonidagi to‘rtta strategik gaz va elektr energetikasi obyektini himoya qilishi kutilmoqda. Hududga yuboriladigan harbiy xizmatchilar soni yaqin kunlarda aniqlashtiriladi.

Biroq Turkiyaning Saudiya Arabistoniga qo‘shimcha harbiy kontingent yuborishi uchun Turkiya Buyuk Millat Majlisi roziligi talab etiladi. Ovoz berish oktyabr oyida o‘tkazilishi kutilmoqda.

Ochiq manbalarga ko‘ra, Turkiya hozirda 12 mamlakatda harbiy bazalar yoki harbiy obyektlarga ega. Eng yirik harbiy mavjudligi Shimoliy Kipr Turk Respublikasida bo‘lib, u yerda 30 mingdan ortiq harbiy xizmatchi joylashgan. Bundan tashqari, Turkiyaning Qatar, Iroq, Suriya, Somali va Liviyada ham harbiy obyektlari mavjud.