Turli viloyatlarda noqonuniy yer sotmoqchi boʻlgan firibgarlar ushlandi

Davlat xavfsizlik xizmatining Toshkent viloyati boʻyicha boshqarmasi xodimlari tomonidan tezkor tadbir oʻtkazilgan. Unda Chinoz tumanida faoliyat yurituvchi advokatlik byurosi advokati va uning opasi oʻzaro til biriktirib, hozirda jazo muddatini oʻtayotgan mahkumga tegishli fermer xoʻjaliligining yerini noqonuniy ravishda sotib yubormoqchi boʻlgani aniqlangan. Mazkur 9,72 gektar yer maydoni 2016 yilda Chinoz tumani hokimining qaroriga muvofiq 49 yil muddatga baliqchilik bilan shugʻullanish uchun ijaraga berilgan. Firibgarlar soxta hujjatlar asosida davlat idoralaridagi tanishlari orqali xaridor nomiga rasmiylashtirib berish evaziga 35 ming AQSh dollari talab qilgan.

Navbatdagi holatda Andijon shahridagi ulgurji savdo faoliyati bilan shugʻullanuvchi masʼuliyati cheklangan jamiyatning muqaddam bir necha marotaba sudlangan rahbari yakka tartibdagi tadbirkor bilan til biriktirib, oʻziga Asaka tumani hokimining 2020 yildagi qaroriga asosan issiqxona inshootlari qurish maqsadida ajratilgan 1 gektar yer maydonining toifasini mansabdor tanishlari orqali oʻzgartirib, u yerda 30 ta kottej tipidagi uy-joylar qurish uchun tegishli hujjatlarni rasmiylashtirishni rejalashtirgan. Bu ish evaziga xaridordan 230 ming AQSh dollari talab qilgan. Davlat xavfsizlik xizmatining Andijon viloyati boʻyicha boshqarmasi xodimlari tomonidan oʻtkazilgan tezkor tadbirda, ular soʻralgan pul mablagʻidan 30 ming AQSh dollarini oldindan olgan vaqtlarida ushlangan. 

Shuningdek, Davlat xavfsizlik xizmatining Surxondaryo viloyati boʻyicha boshqarmasi xodimlari ham tezkor tadbir oʻtkazgan. Unda Jarqoʻrgʻon tumanidagi chorvachilikka ixtisoslashgan fermer xoʻjalik rahbari 2015 yilda tuman hokimining qarori bilan chorvachilik va qishloq xoʻjaligi mahsulotlari yetishtirish maqsadida 49 yil muddatga ijaraga berilgan yer maydonining 11 gektar qismini kadastr idoralaridagi tanishlari orqali xaridor nomiga rasmiylashtirib berishni vaʼda qilgan. Buning evaziga 430 mln soʻm talab qilib, oldindan 23 600 AQSh dollari va 100 mln soʻm olgan vaqtida ashyoviy dalillar bilan ushlandi. 

Bundan tashqari, Davlat xavfsizlik xizmatining Xorazm viloyati boʻyicha boshqarmasi xodimlari oʻtkazgan tezkor tadbirda esa Urganch shahrida yashovchi, 1969 va 1980 yillarda tugʻilgan 2 nafar fuqaro Urganch tumani hokimligi zaxirasidagi 5 sotix yer maydonini mansabdor tanishlari orqali olib berishni aytgani aniqlangan. Ular maishiy xizmat koʻrsatish shoxobchasi qurmoqchi boʻlgan tadbirkor nomiga rasmiylashtirib berish evaziga 350 mln soʻm talab qilib, oldindan 300 mln soʻm olgan vaqtlarida ushlangan. 

Hozirda mazkur shaxslarga nisbatan jinoyat ishlari qoʻzgʻatilib, tergov harakatlari olib borilmoqda.