Wolt kompaniyasi Oʻzbekistondagi faoliyatini toʻxtatadi

“Bu qarorni qabul qilish bizga oson kechmadi. Mijozlar va hamkorlarimizga sifatli xizmat koʻrsatish, shuningdek, siz va boshqa kurerlar uchun raqobatbardosh sharoitlar yaratish doimo ustuvor vazifamiz boʻlib kelgan. Oʻtgan ikki yil mobaynida biz Oʻzbekistonda birgalikda salmoqli natijalarga erishdik va bundan faxrlanamiz”, – degan “Wolt Uzbekistan” bosh menejeri Zafar Ishoqov.

Kompaniya bozor sharoitlarini tahlil qilish natijasida Oʻzbekistondagi faoliyatini toʻxtatish eng toʻgʻri qaror degan xulosaga kelgan.

Wolt kurerlari nima qilsin?

Bosh menejerning taʼkidlashicha, kurerlar 4 martgacha (shu kuni ham) buyurtmalarni bajarishda davom etishi mumkin. 

5 martdan boshlab yangi buyurtmalarni qabul qilish toʻxtatiladi.

Barcha bajarilgan xizmatlar haqi toʻlab beriladi.

Shuningdek, kompaniya kurerlarga xizmatni rivojlantirishga qoʻshgan hissasi va birgalikda mijozlarga Oʻzbekistonning eng sara taomlarini yetkazib bergani uchun samimiy minnatdorchiligini bildirgan.

1,5 yillik faoliyat

Wolt brendiga 2014 yil Finlandiyada asos solingan. Hozirda 30 dan ortiq davlatlarda faoliyat yuritmoqda.

2019 yil Qozogʻistonda filial ochish orqali Markaziy Osiyoga kirib keldi. 2024 yil sentabr oyidan Oʻzbekistonda oʻz xizmatlarini koʻrsata boshlagan.

Muallif: Isomiddin Jumanazarov