Zelenskiy Yevropa davlatlari rahbarlariga minnatdorlik bildirdi

Ukraina prezidenti Vladimir Zelenskiy Yevropa davlatlari rahbarlariga mamlakatning mustaqilligi va hududiy yaxlitligini qoʻllab-quvvatlagani, shuningdek, «urushni munosib tinchlik bilan tugatishga yordam berishi mumkin boʻlgan» faol diplomatik pozitsiyasi uchun minnatdorlik izhor etdi. Bu haqda u oʻzining rasmiy Telegram kanalida yozdi.

«Biz barchamiz prezident Trampning qatʼiyatini qoʻllab-quvvatlaymiz va Rossiya yana bir bor dunyoni aldashiga yoʻl qoʻymaydigan pozitsiyalarni birgalikda shakllantirishimiz kerak», — dedi Zelenskiy.

Uning taʼkidlashicha, «Rossiya armiyasi urushni toʻxtatishga tayyorgarlik koʻrmayapti», aksincha «yangi hujum operatsiyalariga tayyorgarlik koʻrayotganini koʻrsatadigan harakatlar bilan shugʻullanmoqda». Shu sharoitda, u taʼkidlaganidek, «dunyo birligiga hech narsa tahdid solmasligi juda muhim».

Zelenskiy Ukraina va Yevropaning xavfsizligiga oid masalalar barcha tomonlar tomonidan muhokama qilinayotganini aytib, har qanday qaror umumiy xavfsizlik salohiyatini oshirishi kerakligini bildirdi. Shuningdek, «qotilliklarni toʻxtatishdan bosh tortgani uchun Rossiya javobgar boʻlishi kerak» va «urush va okkupatsiya davom etayotgan ekan, bosim  harbiy, sanksiyaviy va diplomatik koʻrinishda davom etishi lozim»ligini qoʻshimcha qildi.