Xalqaro aeroportda oʻrindiqlar yetishmasligi boʻyicha eʼtiroz bildirildi

Fuqarolarning taʼkidlashicha, aeroport oldiga qoʻshimcha bino qurildi, avtoulovlarning bino eshigi oldigacha kirishi taʼminlandi, yashil-qizil yoʻlak, dam olish kapsulalari oʻrnatildi. Biroq shunga qaramay, yoʻlovchilar oʻtirib kutib turishi uchun oʻrindiqlar soni keskin kamligicha qolmoqda.

Ayrim kuzatuvlarga koʻra, roʻyxatdan oʻtish uchun ertaroq kelgan fuqarolar oʻrindiqlar yetishmasligi tufayli polda yotgan holatlar ham qayd etilgan. Bu esa jamoatchilik tomonidan keskin norozilikka sabab boʻlmoqda.

Aeroportda boʻsh maydonlar mavjud boʻlgan holda, unga qoʻshimcha oʻrindiqlar oʻrnatilmagani tanqid qilinmoqda. Fuqarolar fikriga koʻra, yirik xalqaro aeroportda bunday kamchilik mamlakat imijiga ham taʼsir koʻrsatishi mumkin.

Ayni paytda masʼul idoralar tomonidan ushbu eʼtirozlarga munosabat bildirilmagan.