Kecha, 15 oktabr kuni Lyuksemburgda Yevropa Ittifoqining energetika vazirlari uchrashuvi yakunlari boʻyicha oʻtkazilgan matbuot anjumanida YIning energetika boʻyicha komissari Kadri Simons Rossiyadan Ukraina orqali keladigan gaz shartnomasi yanvar oyida tugaganidan keyin Rossiya gazini boshqaga almashtirish kerakligini va buning imkoni borligini aytgan.

"Men vazirlarga Rossiya va "Neftgaz" oʻrtasidagi shartnomani tugatishga tayyor ekanligimizni tasdiqladim. 14 milliard kub metr Rossiya gazini boshqaga almashtirish imkoniyatlari bor. Men aniq aytmoqchimanki, bu zarurat emas, balki siyosiy tanlov va shu bilan birga xavfdir", degan u.

Rossiyaning Ukrainaga qarshi urushi davom etayotganiga qaramay, Rossiya hali ham Ukraina orqali Yevropa Ittifoqi mamlakatlariga gaz yetkazib berayotgan edi. Rossiyaning "Gazprom" kompaniyasi va Ukrainaning "Neftgaz" shirkati oʻrtasida besh yil oldin tuzilgan shartnoma 2024 yilning dekabr oyida tugaydi.

Maʼlumot uchun, joriy yilning iyul oyida Germaniyaning "Handelsblatt" iqtisodiy gazetasi Yevropaning bir qancha davlatlari Rossiya gazini Ukraina orqali YIga yetkazib berishni davom ettirish uchun ish olib borayotganini yozgandi. Oʻsha vaqtda Germaniya Iqtisodiyot vazirligi va Yevrokomissiya birgalikda Germaniya hukumati hamda Bryussel tranzit gaz oluvchi Yevropa Ittifoqi davlatlari bilan muzokaralar olib borayotganini aytgan edi. Ukrainada boʻlayotgan urushga qaramay, Rossiya Avstriya, Slovakiya, Vengriya va Chexiya kabi Yevropa Ittifoqining aʼzosi boʻlgan davlatlariga gaz yetkazib berayotgan edi.

Shu yilning iyun oyda "Bloomberg" nashri oʻz manbalariga tayanib, Yevropa Ittifoqining rasmiylari 2025 yilda Rossiya-Ukraina asosiy quvuri orqali gaz yetkazib berishda muzokaralar olib borayotgani haqida xabar bergan edi. Yevropa Ittifoqi davlatlari muhokama qilayotgan variantlardan biri Yevropa kompaniyalari Ozarbayjondan gaz sotib olib, uni ittifoq hududiga kelayotgan Rossiya quvurlariga quyish orqali YI mamlakatlariga tarqatish edi.

Eslatib oʻtamiz, shu yilning mart oyida Ukraina energetika vaziri German Galushchenko Kiyev hech qanday qoʻshimcha kelishuvlar tuzish yoki Rossiya bilan gaz tranziti boʻyicha kelishuvni uzaytirish niyatida emasligini taʼkidlagan edi.

#Yevropa Ittifoqi

Yevropa Ittifoqi Rossiya gazisiz ham yashay oladi — Kadri Simons