Yevropa razvedkasi: aslida Rossiya tinchlik kelishuvini istamaydi

Reuters nashri anonimlikni saqlagan holda Yevropaning beshta josuslik agentligi rahbarlari bilan suhbatlashdi.

Ularning fikricha, Moskva AQSh bilan muzokaralardan sanksiyalarni yumshatish va biznes kelishuvlarini rivojlantirish uchun foydalanyapti.

“Shu hafta Jenevada boʻlib oʻtgan muzokaralar – bu shunchaki “muzokara teatri”, xolos”, – dedi razvedka xizmati rahbarlaridan biri.

Bu qarashlar Yevropa davlatlari va Oq uy vakillari oʻrtasidagi fikrlashda jiddiy tafovut mavjudligini koʻrsatyapti.

Chunki Trampning soʻzlaridan xulosa qilinsa, u Rossiya prezidenti Vladimir Putin kelishuv tuzish niyatida, deb hisoblaydi.

“Rossiya tinchlik shartnomasini tuzishga intilmayapti. Ular oʻz strategik maqsadlari tomon intilmoqda va bu maqsadlar oʻzgargani yoʻq”, – dedi razvedka rahbarlaridan biri.

Bu maqsadlar ichida Ukraina rahbari Volodimir Zelenskiyni lavozimidan chetlatish va Ukrainani Gʻarb uchun “neytral” bufer hududga aylantirish ham bor.

Ikkinchi razvedka boshligʻining aytishicha, aslida Kreml yaqin orada tinchlik kelishuvini xohlamaydi, bunga ehtiyoji ham yoʻq. Uning iqtisodiyoti tanazzul yoqasida emas.

Biroq uchinchi rasmiyning soʻzlariga koʻra, Rossiya 2026 yilning ikkinchi yarmida yuqori moliyaviy xatarlarga duch keladi. Bunga sanksiyalar va qarz olishning qimmatligi sababli Moskvaning kapital bozorlariga kirish imkoniyati cheklangani kabi omillar sabab qilib keltirilgan.

Ayrim tahlilchilar oʻtgan yili atigi 1 foiz oʻsish qayd etgan Rossiya iqtisodiyotini turgʻunlik va tanazzul oʻrtasida, deb baholagan.

Razvedkachilar ushbu maʼlumotlarni qanday olganliklarini aytmagan. Biroq ular insondan olingan axborot, tutib olingan aloqalar va boshqa turli vositalardan foydalanishi maʼlum.

Putin tinchlikka tayyorligini, faqat shartlari borligini aytgan. Rossiya rasmiylariga koʻra, Yevropa hukumatlari Rossiyaga baho berishda bir necha bor adashgan.

Befoyda muzokara

Ukraina va Rossiya muzokarachilari shu hafta AQSh vositachiligida 2026 yildagi uchinchi uchrashuvini oʻtkazdi, biroq asosiy muammo boʻlgan hududiy masala boʻyicha arzirli yutuqqa erishilmadi.

Siljish yoʻqligidan hafsalasi pir boʻlgan Zelenskiy uchrashuvdan soʻng rossiyaliklar kelishuvga erishishdan koʻra, mojaroning tarixiy ildizlarini muhokama qilishga koʻproq qiziqayotganini taʼkidladi.

“Urushni tugatib, diplomatiyaga oʻtish uchun menga oʻtmishdagi safsata gaplar kerak emas. Chunki bu shunchaki vaqtni choʻzish”, – deb yozdi Zelenskiy X ijtimoiy tarmogʻida.

Moskva sharqiy Donetsk viloyatining Rossiya nazorat qilmayotgan 20 foiz hududidan Kiyev oʻz kuchlarini olib chiqib ketishini istaydi. Ukraina esa bundan bosh tortmoqda.

Ikkinchi razvedka boshligʻining fikricha, agar Rossiya Donetskning qolgan qismini egallasa, hududiy jihatdan qanoatlanishi mumkin, lekin bu bilan Zelenskiyning “gʻarbparast” hukumatini agʻdarish maqsadi amalga oshmaydi.

Uchinchi razvedka boshligʻi esa Ukrainaning Donetskni topshirishi tinchlik kelishuviga olib keladi, degan fikr xatoligini bildirgan.

Shuningdek, razvedkachilar muzokaralarda ishtirok etgan AQSh vakillari na professional diplomat, na Rossiya va Ukraina boʻyicha maxsus tajribaga ega ekanligini taʼkidlagan.

Oq uy vakili Anna Kelli ismini oshkor qilmagan tanqidchilar Ukraina urushiga barham berish uchun hech qanday hissa qoʻshmaganini, Prezident Tramp va uning jamoasi qon toʻkilishini toʻxtatib, tinchlik kelishuviga erishish yoʻlida har ikki tomonni bir joyga toʻplash uchun eng koʻp harakat qilganini aytgan.