Samarqand viloyati Samarqand shahridagi “Xushrav” qoʻrgʻoni “Navroʻz” MFYda joylashgan 15 gektar hududda hamda Andijon viloyati Xoʻjaobod tumani “Xidirsha” MFY hududidagi 17 gektar yer maydonida chiqindilarni yoqish orqali elektr energiyasi ishlab chiqariladigan zavodlarning qurilish jarayonlariga start berildi.

Maʼlumot uchun, chiqindilarni qayta ishlash va ulardan energiya manbai olishga asoslangan zamonaviy loyihalarni amalga oshirish boʻyicha Ekologiya vazirligi huzuridagi Chiqindilarni boshqarish va sirkulyar iqtisodiyotni rivojlantirish agentligi hamda Xitoy Xalq Respublikasining yetakchi kompaniyalari oʻrtasida bitimlar imzolangan edi. Unda chiqindilarni termik qayta ishlash orqali elektr energiyasi ishlab chiqarish loyihasi Samarqand va Andijon viloyatlarida bosqichma-bosqich tatbiq etilishi nazarda tutilgan.

Taʼkidlash joizki, joriy yil 24 mart kuni Oʻzbekiston Respublikasi prezidentining qattiq maishiy chiqindilarni yoqish orqali elektr energiyasi ishlab chiqarish investitsiya loyihalarini amalga oshirish chora-tadbirlari toʻgʻrisidagi 116 va 118-son qarorlari qabul qilingan edi. Unga koʻra, hududda ekologik vaziyatni yaxshilash, chiqindilarni qayta ishlash sohasiga zamonaviy yechimlar va texnologiyalarni joriy etish orqali elektr energiyasi ishlab chiqariladi hamda sohaga toʻgʻridan-toʻgʻri investitsiya jalb etiladi.

Avvalroq davlat rahbari ushbu loyihalar bilan yaqindan tanishgani hamda yurtimizda maishiy chiqindilarni yoqish orqali elektr energiyasi va mahsulot ishlab chiqaradigan 8 ta zavod qurilishi haqida xabar qilgan edik.

Samarqand viloyatidagi loyihada “Shanghai SUS Environment” LLC kompaniyasi tomonidan umumiy qiymati 150 mln AQSh dollari miqdorida investitsiya jalb etilgan. Kuniga 1,5 ming tonna chiqindi qayta ishlanib, yiliga jami 240 mln kVt/soat elektr energiyasi ishlab chiqariladi. Unda 150-200 ta yangi ish oʻrni yaratiladi.

Andijon viloyatidagi loyihada esa “China International Camce” kompaniyasi tomonidan umumiy qiymati 140 mln AQSh dollari miqdorida investitsiya kiritilmoqda. Natijada kuniga 1,5 ming tonna chiqindi qayta ishlanib, yiliga jami 240 mln kVt/soat elektr energiyasi ishlab chiqariladi va 150 ta yangi ish oʻrni yaratiladi. Shuningdek, investorlar tomonidan 2025–2027 yillarda loyihalar ishga tushirilishi koʻzda tutilgan.

Qolaversa, elektr energiyasini sotib olish va qattiq maishiy chiqindilarni yetkazib berish toʻgʻrisidagi bitimlarga muvofiq kompaniyalar ishlab chiqargan elektr energiyasini 30 yil davomida “Oʻzenergosotish” AJga kafolatlangan tarzda sotadi.

#zavod

Ikki viloyatda maishiy chiqindidan elektr energiyasi olinadigan zavodlar qurilishi boshlandi