Туркияда заҳарланиш ортидан 14 нафар ўзбекистонлик вафот этди

Жорий йилнинг 16 январь ҳолатига кўра, Туркия ҳудудида қалбаки спиртли ичимлик истеъмоли оқибатида яна 4 нафар Ўзбекистон фуқароси (барчаси эркак) вафот этган. 15 январь куни эса 4 нафар, 14 январь куни 6 нафар ўзбекистонлик заҳарланиш оқибатида ҳалок бўлган эди. 

Олинган маълумотларга кўра, бугун қалбаки спиртли ичимлик истеъмоли ташхиси билан Туркия бўйлаб касалланганлар сони 88 нафарни ташкил этиб, шундан 37 нафари вафот этган. Ушбу қурбонлар орасида маҳаллий аҳоли вакиллари ва бошқа миллат вакиллари ҳам мавжуд. 

Истанбул ҳокимлиги томонидан тақдим этилган маълумотга кўра, маҳаллий ҳуқуқ-тартибот идоралари 2025 йил 16 январь куни Истанбул шаҳрида 32 862 литр ноқонуний метил ва этил спиртли ичимликларни мусодара қилган. Тадбирлар Султангази, Фатиҳ, Бакиркўй, Кучукчекмеже, Чаталжа, Эсенюрт, Зейтинбурну ва Бейкоз туманларида ўтказилиб, 9 нафар гумонланувчи қўлга олинган. 

Текширувлар чоғида 227 шиша сохта ичимлик ва дистиллаш ускунаси ҳам топилган. Қўлга олинганлардан 3 нафари полициядаги сўроқлардан сўнг қўйиб юборилган бўлса, 6 нафарининг тергови давом этмоқда. 

Бош консулхона дипломатлари Истанбул шаҳридаги шифохоналарнинг жонлантириш бўлимларида қалбаки спиртли ичимликдан заҳарланиш оқибатида даволанаётган ўзбекистонлик фуқароларнинг ҳолидан хабар олган. Улар очиқлаган маълумотларга кўра, заҳарланганларнинг 3 нафари оғир аҳволда. 

Шунингдек, Бош консулхона Туркияда бўлиб турган барча Ўзбекистон фуқароларини спиртли ичимликлардан тийилишга ва шахсий хавфсизлик қоидаларига қатъий риоя қилишга чақирган.