Туркия ва уч давлат ҳусийларнинг Ар-Риёд аэропортига ҳужумларини қоралади

Тўрт давлатдан қўшма баёнот

Туркия, Покистон, Миср ва Саудия Арабистони Ямандаги ҳусийлар ҳаракатининг Ар-Риёд халқаро аэропортига қилган ҳужумларини кескин қоралади. Томонлар ушбу ҳужумларни минтақавий хавфсизликка таҳдид солувчи хавфли ҳаракатлар сифатида баҳолади.

Reuters агентлигининг 12 октябрда хабар беришича, Саудия расмийлари якшанба куни аэропортга уюштирилган ҳужум оқибатида бир киши ҳалок бўлгани ва қарийб 12 киши жароҳатланганини маълум қилган. Бундан бир кун олдинги ҳужумда эса 13 киши ҳалок бўлган, 300 дан ортиқ одам жароҳатланган.

«R4» деб аталувчи тўрт давлат гуруҳи қўшма баёнотида ҳусийларни ҳужумлар оқибатлари учун тўлиқ жавобгар деб ҳисоблашини билдирди. Шунингдек, давлатлар минтақавий ва халқаро тинчлик ҳамда хавфсизликка таҳдид солувчи ҳаракатларни зудлик билан ва ҳеч қандай шартларсиз тўхтатишга чақирди.

Мамлакатлар Саудия Арабистони билан бирдамлигини тасдиқлаб, унинг ҳужумларнинг олдини олиш ва хавфсизликни таъминлашга қаратилган қонуний чораларини қўллаб-қувватлашини билдирди.

Туркия ва Покистоннинг мудофаа ҳамкорлиги

Туркия ва Покистон август ойида Саудия Арабистони билан қўшма мудофаа келишувини имзолаган эди. Келишув доирасида томонлар жамоавий мудофаа мажбуриятларини амалга ошириш ҳамда зарурат туғилганда Саудия Арабистонига ҳарбий куч ва зарур имкониятларни тезкор жойлаштириш масалаларини кўриб чиққан.

Туркия ташқи ишлар вазири Ҳоқон Фидан Анқара Саудия Арабистонига қандай ёрдам кўрсатиш мумкинлигини баҳолаётганини билдирган. Бироқ у Туркия қўшинларини жойлаштириш ёки ҳужумкор ҳарбий операцияларда иштирок этиш режалаштирилмаётганини таъкидлаган.

Reuters маълумотларига кўра, Туркия Саудия Арабистонига асосан мудофаавий ва техник ёрдам кўрсатмоқда. Шу билан бирга, қўшма мудофаа келишуви Туркия парламенти томонидан ҳали расман ратификация қилинмаган.

Қизил денгиздаги хавфсизлик масаласи

Туркия Саудия Арабистони билан мудофаа соҳасидаги ҳамкорликни кенгайтирмоқда. Анқара аввал ҳам Риёдга мудофаа ускуналарини етказиб берган ва Қизил денгизда кемалар ҳаракати хавфсизлигини таъминлашга қаратилган, Саудия Арабистони бошчилигидаги коалицияга қўшилишга рози бўлган.

Ар-Риёд аэропортига қилинган ҳужумлар Яман атрофидаги можаронинг минтақавий хавфсизликка таъсири кучайиши мумкинлигини кўрсатмоқда. Туркия, Покистон, Миср ва Саудия Арабистонининг қўшма баёноти эса ҳужумларга қарши минтақавий ҳамкорликни мустаҳкамлашга қаратилган.

Муаллиф: Ҳасанбой ОЧУН