Туркия Саудия Арабистонида ҳарбий базасини қуради

“Türkiye” газетасига кўра, Анқара яқин ҳафталарда Саудия Арабистонига чекланган таркибдаги ҳарбий контингент ва ҳарбий техника юборишни режалаштирмоқда.

Туркия 2025 йилдан буён Саудия Арабистонида муҳим инфратузилма объектларини ҳимоя қилиш мақсадида 200 нафардан ортиқ ҳарбий мутахассис ва техник ходимни сақлаб келмоқда. Улар ихтиёрида ҳаво ҳужумидан мудофаа ҳамда радиоэлектрон кураш воситалари ҳам мавжуд.

Нашр маълумотига кўра, 5 октябрь куни Ар-Риёдда Макка альянсига кирувчи Покистон, Саудия Арабистони ва Туркия ҳарбий кучларни жойлаштириш ҳамда қўшма мудофаа мажбуриятларини амалга оширишни бошлашга қарор қилган.

Келишув доирасида Туркия ўрта ва яқин масофага мўлжалланган ҳаво ҳужумидан мудофаа тизимлари ёрдамида Саудия Арабистонидаги тўртта стратегик газ ва электр энергетикаси объектини ҳимоя қилиши кутилмоқда. Ҳудудга юбориладиган ҳарбий хизматчилар сони яқин кунларда аниқлаштирилади.

Бироқ Туркиянинг Саудия Арабистонига қўшимча ҳарбий контингент юбориши учун Туркия Буюк Миллат Мажлиси розилиги талаб этилади. Овоз бериш октябрь ойида ўтказилиши кутилмоқда.

Очиқ манбаларга кўра, Туркия ҳозирда 12 мамлакатда ҳарбий базалар ёки ҳарбий объектларга эга. Энг йирик ҳарбий мавжудлиги Шимолий Кипр Турк Республикасида бўлиб, у ерда 30 мингдан ортиқ ҳарбий хизматчи жойлашган. Бундан ташқари, Туркиянинг Қатар, Ироқ, Сурия, Сомали ва Ливияда ҳам ҳарбий объектлари мавжуд.