Баҳодир Жалолов навбатдаги ғалабасини қўлга киритди, аммо жанг оғир кечди

8 раундга мўлжалланган жанг тўлиқ давом этди. Ҳар икки спортчи ҳам жангни юқори суръатда бошлади, аммо раундлар ўтиши билан кучли зарбалар ва жисмоний юкламалар таъсири сезила бошлади.

Ҳакамлар қарорига кўра, Баҳодир Жалолов рақибини очколар (77–73, 77–74, 78–72) ҳисобида мағлуб этди ва ўзининг навбатдаги профессионал ғалабасини қўлга киритди.

Аммо жангни кузатган барча Жалолов охирги раундларда анча чарчаб қолганини кўрди. Рақиб яқин келганда у кўпроқ ҳимоя тактикасига ўтиб, максимал даражада клинчга киришга ҳаракат қилди, нафас олишда қийналди.

Баҳодир Жалолов жангдан кейин ўзининг ҳаракатларидан тўлиқ қониқмагани, жисмоний тайёргарликни янада ошириши зарурлиги ҳақида гапирди.

Шу тариқа, Жалолов ғалаба қозонган бўлса-да, бу жанг унга жиддий сабоқ берди.

Баҳодир Жалолов профессионал фаолиятидаги навбатдаги жангини 2025 йил охирига қадар ўтказиши режалаштирилган.