Британияда ёз фаслида 3 081 та намойиш бўлиб ўтди, кўпчилиги Фаластинни қўллаб-қувватлаш мақсадида ўтказилди

2025 йилнинг июн, июль ва август ойларида Буюк Британия ҳудудида жами 3 081 та намойиш ташкил этилди. Миллий полиция раҳбарлари кенгаши (NPCC) хабарига кўра, уларнинг асосий қисми Фаластинни қўллаб-қувватлаш билан боғлиқ бўлган.

NPCC маълумотига кўра, митинг ва акцияларнинг хавфсизлигини таъминлаш ҳамда намойишчиларга муносабат билдириш полиция ишининг катта қисмини эгаллаб олган. Солиштириш учун: 2024 йил ёзида (ўнг қанотчи зўравонликлар кескин кучайган даврда) 2 942 та акция ўтказилган бўлса, 2023 йилда бу рақам атиги 928 ни ташкил этган. Шундай қилиб, икки йил ичида намойишлар сони уч баравардан кўпроқ ошган.

NPCC раиси Гэвин Стивенс намойишлар кўпайиши полицияга катта юклама берганини қайд этди. Унинг айтишича, жамиятда кескинлик ва бўлиниш кучайиб бораётганига ҳамма, жумладан полиция раҳбарлари ҳам масъулият билан эътибор қаратиши зарур. 

«Ҳар бир раҳбар аҳоли ўртасидаги қарама-қаршиликни кучайтирмайдиган, балки тинчликка хизмат қиладиган чораларни кўриши керак», — деди у.

Стивенснинг таъкидлашича, бу акцияларнинг хавфсизлигини таъминлаётган полиция ходимлари кундалик вазифаларни бажарадиган оддий хизматчилар ҳисобланади. У Британияда «оммавий фуқаровий итоатсизлик хавфи ҳақидаги» даъволарни асоссиз деб атади, бироқ 55% полициячилар жисмоний чарчоқдан азият чекаётганини маълум қилди. 

Шу билан бирга, у намойишларнинг кўпайиши молиявий босимни ҳам кучайтираётганини таъкидлаб, қўшимча ресурслар ажратилмаса, жиноятчилик даражасини пасайтириш бўйича режаларга эришиш қийин бўлишини огоҳлантирди.