Исроил 10 минг фаластинликка Ал-Ақсо масжидига киришга рухсат берди

Исроил Ал-Ақсо мажмуасига муқаддас Рамазон ойида 10 минг фаластинлик намозхон киришига рухсат берди.

Рамазон ойи давомида жума намози учун ўн мингта фаластинлик намозхонга Маъбад тоғига киришга рухсат берилади. Бунинг учун улар олдиндан махсус кунлик рухсатнома олишлари шарт, дейилади Исроил мудофаа вазирлигининг босиб олинган ҳудудларда Фаластин фуқаролик ишларини назорат қилувчи идораси баёнотида.

Шунингдек, ҳукумат қўшимча чекловлар жорий қилган: фақат 55 ва ундан катта ёшдаги эркаклар, 50 ва ундан катта ёшдаги аёллар ва 12 ёшгача бўлган болалар масжид ҳудудига ҳар ҳафта кириши мумкин.

Рамазон ойида юз минглаб фаластинликлар анъанавий тарзда Исломнинг учинчи муқаддас жойи ҳисобланадиган, Шарқий Қуддусда жойлашган ва 1967 йилда Исроил томонидан босиб олинган Ал-Ақсода ибодат қилиб келишган.

Ал-Ақсо масжидининг катта имоми Шайх Муҳаммад ал-Аббосий AFP агентлигига берган интервьюсида уни масжидга киритиш тақиқлангани, бир ҳафтадан буён киролмаётганини айтди. Унинг фикрича, бу тақиқ чўзилиши мумкин.

1967 йилги келишувларга кўра, яҳудийлар Ал-Ақсо мажмуасига ташриф буюришлари мумкин – улар бу жойни биринчи ва иккинчи яҳудий ибодатхоналари жойлашган муқаддас макон сифатида эъзозлайдилар. Аммо ибодат қилишларига рухсат берилмайди.

Исроил ушбу келишув сақланишини таъкидламоқда, аммо фаластинликлар вазият ёмонлашиб бораётганидан хавотирда.

Сўнгги йилларда тобора кўпайиб бораётган ўта миллатчи яҳудийлар ибодат қилиш тақиғига эътироз билдирмоқда.

Уларнинг орасида ўта ўнг сиёсатчи Итамар Бен-Гвир ҳам бор. У 2024 ва 2025 йиллар Миллий хавфсизлик вазири бўлиб ишлаган пайтида мазкур жойда ибодат қилган эди.