Chevrolet Tracker’нинг янгиланган модели намойиш қилинди

Tracker кроссовери ҳозирги авлоди илк бор 2019 йили Хитойда тақдим этилган эди. Кейинчалик ушбу модел Бразилия, Аргентина ва Ўзбекистонда ҳам ишлаб чиқариш йўлга қўйилди. 

2022 йилда Хитойда спорт кўринишдаги RS версияси намойиш этилган бўлиб, унинг салонига янгилик киритилган, бироқ ташқи кўриниши деярли ўзгармаган эди.

Хитой бозорида Tracker кутилган муваффаиятни қўлга кирита олмаган ва ушбу модел йиғилиши тўхтатилгани хабар қилинган. Аммо Лотин Америкасида, айниқса Бразилияда, ушбу кроссовер катта талабга эга.

General Motors’нинг Бразилиядаги бўлими янгиланган Tracker’нинг оммавий ишлаб чиқарилишини бошлаганини маълум қилди ва заводдаги биринчи моделлар суратларини эълон қилди. Янги Tracker икки қаватли ёруғлик тизими билан жиҳозланган: юқорида ёруғлик диодли юлдузсимон чироқлар, пастда эса асосий фарлар жойлашган. Шунингдек, янги бампер ва радиатор панжарасида янгиликлар бор.

Салон ҳам янгиланган бўлиб, мултимедиа планшети ва рақамли панел бирлаштирилган. Янги «иқлим» назорати дисплей ва иккита айланувчи тугма билан бошқарилади.

Техник жиҳатлар ҳақида ҳали расмий маълумот берилмади. Аммо 2023 йил охирида Tracker’нинг Бразилия версиясидаги моторлари модернизация қилинган эди. Бензин ва этанолда ишлайдиган 1.0 ва 1.2 турбомоторлар шундайлигича сақланиши кутилмоқда. Улар мос равишда 117/121 ва 139/141 от кучига эга бўлиб, 6 поғонали автомат қутиси билан жиҳозланган.

Янгиланган Tracker’нинг тўлиқ тақдимоти яқин ҳафталарда ўтказилиши режалаштирилган.