Чиқиндиларни олиб кетиш хизматида янги тўлов тизими жорий этилди

2026 йил 1 январдан бошлаб Ўзбекистонда қаттиқ маиший чиқиндиларни олиб кетиш хизматида янги тўлов тартиби амалга киритилди. 

Онлайн тизим афзалликлари

Янги тизим фойдаланувчиларга тўловни исталган вақт ва жойда амалга ошириш имконини беради. Банкка бориш талаб этилмайди. Шунингдек, ҳисобларни текшириш ва тўлов чекларини юклаб олиш осонлашади. Натижада ноқонуний тўловлар ва маблағларни яшириш ҳолатлари бартараф этилади.

Маблағлар давлат назоратига олинди

Янги тартибга кўра, аҳолидан тушган маблағлар тўғридан-тўғри санитар корхоналарга эмас, балки давлат назоратидаги махсус ҳисоб рақамига йўналтирилади. Ушбу ҳисоб рақами Чиқиндиларни бошқариш ва циркуляр иқтисодиётни ривожлантириш агентлиги томонидан юритилади.

Операторларга тўлов фақат ҳақиқий бажарилган иш ҳажми — чиқинди тоннаси ва махсус техниканинг босиб ўтган масофаси асосида амалга оширилади.

Корхоналар фаолияти рейтинг асосида баҳоланади

Санитар корхоналар ҳар ой “қизил”, “сариқ” ва “яшил” тоифаларга ажратилиб баҳоланади. Паст сифатли хизмат кўрсатганларга нисбатан жарима қўлланади ёки шартнома бекор қилинади.

Ҳозирга қадар 14 та корхона “қизил” тоифага тушиб жаримага тортилган, икки корхона билан эса шартнома бекор қилинган. Амалда кўрсатилмаган хизматлар учун ҳисобланган 11,9 миллиард сўмлик нореал қарздорликлар тизимдан чиқарилди.

Рақамли назорат кенгаймоқда

“Тоза Макон” ягона электрон биллинг тизимига 9 430 та маҳалла ва 7,1 миллион абонент уланган. Шунингдек, 3 606 та чиқинди йиғиш жойи электрон харитага киритилган.

Чиқинди ташишда фойдаланилаётган 3 230 та махсус техника (94 фоиз) GPS орқали кузатилмоқда. 846 та чиқинди йиғиш майдончаси ва 645 та техника онлайн камералар билан назоратга олинган.

2030 йилгача назоратни 100 фоизга етказиш режалаштирилган.

Бундан ташқари, биллинг тизими электр таъминоти тизими билан интеграция қилинган бўлиб, хизмат сифати устидан назорат янада кучайтирилган.