Chiqindilarni olib ketish xizmatida yangi toʻlov tizimi joriy etildi

2026 yil 1 yanvardan boshlab Oʻzbekistonda qattiq maishiy chiqindilarni olib ketish xizmatida yangi toʻlov tartibi amalga kiritildi. 

Onlayn tizim afzalliklari

Yangi tizim foydalanuvchilarga toʻlovni istalgan vaqt va joyda amalga oshirish imkonini beradi. Bankka borish talab etilmaydi. Shuningdek, hisoblarni tekshirish va toʻlov cheklarini yuklab olish osonlashadi. Natijada noqonuniy toʻlovlar va mablagʻlarni yashirish holatlari bartaraf etiladi.

Mablagʻlar davlat nazoratiga olindi

Yangi tartibga koʻra, aholidan tushgan mablagʻlar toʻgʻridan-toʻgʻri sanitar korxonalarga emas, balki davlat nazoratidagi maxsus hisob raqamiga yoʻnaltiriladi. Ushbu hisob raqami Chiqindilarni boshqarish va sirkulyar iqtisodiyotni rivojlantirish agentligi tomonidan yuritiladi.

Operatorlarga toʻlov faqat haqiqiy bajarilgan ish hajmi — chiqindi tonnasi va maxsus texnikaning bosib oʻtgan masofasi asosida amalga oshiriladi.

Korxonalar faoliyati reyting asosida baholanadi

Sanitar korxonalar har oy “qizil”, “sariq” va “yashil” toifalarga ajratilib baholanadi. Past sifatli xizmat koʻrsatganlarga nisbatan jarima qoʻllanadi yoki shartnoma bekor qilinadi.

Hozirga qadar 14 ta korxona “qizil” toifaga tushib jarimaga tortilgan, ikki korxona bilan esa shartnoma bekor qilingan. Amalda koʻrsatilmagan xizmatlar uchun hisoblangan 11,9 milliard soʻmlik noreal qarzdorliklar tizimdan chiqarildi.

Raqamli nazorat kengaymoqda

“Toza Makon” yagona elektron billing tizimiga 9 430 ta mahalla va 7,1 million abonent ulangan. Shuningdek, 3 606 ta chiqindi yigʻish joyi elektron xaritaga kiritilgan.

Chiqindi tashishda foydalanilayotgan 3 230 ta maxsus texnika (94 foiz) GPS orqali kuzatilmoqda. 846 ta chiqindi yigʻish maydonchasi va 645 ta texnika onlayn kameralar bilan nazoratga olingan.

2030 yilgacha nazoratni 100 foizga yetkazish rejalashtirilgan.

Bundan tashqari, billing tizimi elektr taʼminoti tizimi bilan integratsiya qilingan boʻlib, xizmat sifati ustidan nazorat yanada kuchaytirilgan.