Meta 8000 ходимни ишдан бўшатмоқда

Meta глобал ишчи кучининг 10 фоизини, яъни қарийб 8000 кишини қамраб олувчи оммавий ишдан бўшатиш жараёнини бошлади. 

Reuters ахборот агентлигининг хабар беришича, чоршанба куни бошланган қисқартиришлар уч босқичда амалга оширилиши режалаштирилган бўлиб, биринчи босқич маҳаллий вақт билан тонгги соат 4:00 да бошланади. 

Business Insider агентлигининг ёзишича, ҳозиргача ишдан бўшатилган ходимлар орасида компаниянинг зарарли контент ва ҳақорат сўзларини олиб ташлашга масъул жамоаси, шунингдек, киберхавфсизлик бўлинмалари ва контент дизайни гуруҳи аъзолари бор. 

Meta вакиллари Al-Jazira нашрига маълум қилишича, АҚШдаги ходимлар 16 ҳафталик ишдан бўшатиш нафақаси ҳамда компанияда ишлаган ҳар бир йили учун қўшимча икки ҳафталик товон пули олади. 

Қисқартиришларга қўшимча равишда, Meta 6000 кишини ишга ёллаш режаларини бекор қилишини ва яна 7000 нафар ходимни сунъий интеллект билан боғлиқ иш жараёнларига ўтказишини маълум қилди.

Нега ходимлар тушкунликда?

Мазкур бўшатишлар Марк Сукерберг бошчилигидаги компанияда ишчиларнинг руҳияти тушиб кетаётгани ҳақидаги хабарлар фонида юз бермоқда. 

The Wall Street Journal нашрининг ёзишича, Мета ўзининг сунъий интеллект моделларини ўргатиш мақсадида ходимларни кузатишга мўлжалланган  СИ кузатув дастурини ишга туширган ва бу ишчилар ўртасида норозилик келтириб чиқарган. 

Нашрга кўра, 1500 дан ортиқ киши компаниядан шахсий маълумотларини йиғмасликни талаб қилган. 

Исми сир қолишини истаган бир ходим Wired нашрига берган интервьюсида айтишича, ходимлар тушкунлигига уларнинг ўрнини эгаллаши кутилаётган сунъий интеллект моделларини тизимга киритишда ходимларнинг ўзларидан фойдаланилаётгани сабаб бўлмоқда. 

Хавотирга соладиган яна бир жиҳат – бу ишчиларга ажратиладиган харажатларнинг камайгани, жумладан, йиллик маош ўсишининг қисқариши ва ўртача умумий компенсациянинг қарийб 30 000 долларга пастлаганидир.