Meta 8000 xodimni ishdan bo‘shatyapti

Meta kompaniyasi global ishchi kuchining 10 foizini, ya’ni qariyb 8000 kishini qamrab oluvchi ommaviy ishdan bo‘shatish jarayonini boshladi.

Reuters axborot agentligining xabar berishicha, chorshanba kuni boshlangan qisqartirishlar uch bosqichda amalga oshirilishi rejalashtirilgan bo‘lib, birinchi bosqich mahalliy vaqt bilan tonggi soat 4:00 da boshlanadi.

Business Insider agentligining yozishicha, hozirgacha ishdan bo‘shatilgan xodimlar orasida kompaniyaning zararli kontent va haqorat so‘zlarini olib tashlashga mas’ul jamoasi, shuningdek, kiberxavfsizlik bo‘linmalari va kontent dizayni guruhi a’zolari bor.

Meta vakillari Al Jazira nashriga ma’lum qilishicha, AQSHdagi xodimlar 16 haftalik ishdan bo‘shatish nafaqasi hamda kompaniyada ishlagan har bir yili uchun qo‘shimcha ikki haftalik tovon puli oladi.

Qisqartirishlarga qo‘shimcha ravishda, Meta 6000 kishini ishga yollash rejalarini bekor qilishini va yana 7000 nafar xodimni sun’iy intellekt bilan bog‘liq ish jarayonlariga o‘tkazishini ma’lum qildi.

Nega xodimlar tushkunlikda?

Mazkur bo‘shatishlar Mark Sukerberg boshchiligidagi kompaniyada ishchilarning ruhiyati tushib ketayotgani haqidagi xabarlar fonida yuz bermoqda.

The Wall Street Journal nashrining yozishicha, Meta o‘zining sun’iy intellekt modellarini o‘rgatish maqsadida xodimlarni kuzatishga mo‘ljallangan  SI kuzatuv dasturini ishga tushirgan va bu ishchilar o‘rtasida norozilik keltirib chiqargan.

Nashrga ko‘ra, 1500 dan ortiq kishi kompaniyadan shaxsiy ma’lumotlarini yig‘maslikni talab qilgan.

Ismi sir qolishini istagan bir xodim Wired nashriga bergan intervyusida aytishicha, xodimlar tushkunligiga ularning o‘rnini egallashi kutilayotgan sun’iy intellekt modellarini tizimga kiritishda xodimlarning o‘zlaridan foydalanilayotgani sabab bo‘lmoqda.

Xavotirga soladigan yana bir jihat – bu ishchilarga ajratiladigan xarajatlarning kamaygani, jumladan, yillik maosh o‘sishining qisqarishi va o‘rtacha umumiy kompensatsiyaning qariyb 30 000 dollarga pastlaganidir.