Сунъий интеллект мустақил равишда киберҳужум уюштирди

Кибернетик хавфсизлик мутахассислари тарихда илк маротаба сунъий интеллект агенти томонидан мустақил равишда амалга оширилган товламачи киберҳужумни қайд этди. Ушбу воқеа СИ технологияларининг киберхавфсизлик соҳасида қандай хавфлар туғдириши мумкинлигини яққол намойиш этди.

Ҳужумнинг биринчи босқичида агент интернет орқали кириш мумкин бўлган Langflow тизимининг заиф нусхасидан фойдаланиб, кодни масофадан туриб ишга тушириш имконига эга бўлган. Кейин у муҳитни синчиклаб "ўрганиб чиққан" — СИ провайдерларининг API калитларини, булутли хизматлар ҳисоб маълумотларини, жумладан Alibaba, Tencent ва Huawei каби Хитой провайдерлари бўйича махсус маълумотларни, шунингдек криптоҳамён маълумотлари, конфигурация файллари ва PostgreSQL маълумотлар базасидаги фойдаланувчи ёзувларини тўплаган. 

Бундан ташқари, агент стандарт кириш маълумотларига эга бўлган MinIO объект омборини аниқлаб, унинг барча жилдларини кўздан кечириб, муҳим кириш калитларини ўз ичига олган файлни ажратиб олишга муваффақ бўлган.
Иккинчи босқичда агент асосий нишонга — MySQL маълумотлар базаси ва Alibaba Nacos конфигурацияларни бошқариш хизматига эга бўлган алоҳида серверга ўтган. У аутентификация тизимидаги маълум CVE-2021-29441 заифлигидан ҳамда JWT-токенларни имзолаш учун ишлатиладиган стандарт калитдан фойдаланиб, Nacos хизмати устидан тўлиқ назоратни қўлга киритган. Шундан сўнг MySQL маълумотлар базасига кириб, у ерга ўзининг администраторлик ҳисоб қайдномасини қўшган.

Xатоларни тузатиш тезлиги ҳужум ортида инсон эмас, балки сунъий интеллект турганини аниқ кўрсатган. Администратор ҳисобини яратишга қилинган дастлабки уриниш пароль генерациясидаги техник носозлик сабабли муваффақиятсиз якунланган эди. Бироқ атиги 31 сония ичида агент муаммони мустақил равишда аниқлаб, уни бартараф этган, муваффақиятсиз яратилган ёзувни ўчириб, унинг ўрнига янги, ишлайдиган ёзувни шакллантирган. Шундан кейин у тизимга тўлиқ муваффақиятли кириб борган. Бутун операция давомида шунга ўхшаш носозлик — дарҳол ташхис қўйиш — тезкор тузатиш тартиби бир неча марта такрорланган.

 

Ҳужумнинг сўнгги босқичида агент товон ундиришга ўтган. У Nacos конфигурациясидаги жами 1342 та элементни шифрлаган, дастлабки маълумотлар ва фаолият тарихини бутунлай ўчириб ташлаган. Шундан сўнг у товон миқдори, биткоин-манзил ва алоқа маълумотлари кўрсатилган хабар қолдирган. Диққатга сазовор жиҳати шундаки, шифрлаш калити тасодифий тарзда генерация қилиниб, фақат экранга чиқарилган, лекин ҳеч қаерда сақланмаган — бу эса ҳужумнинг қанчалик хавфли ва баъзи жиҳатдан "тартибсиз" тарзда амалга оширилганини кўрсатади.